New AC Tips| उन्हाळा सुरू होताच घराघरात एअर कंडिशनर (AC) ची मागणी वाढते. तापमान वाढल्यामुळे अनेक जण नवीन एसी खरेदी करण्याचा विचार करत आहेत. तुम्हीही AC खरेदीचा विचार करत असाल तर ही बातमी तुमच्यासाठीच आहे. AC खरेदी करताना काही चुका टाळल्या पाहिजेत. त्या चुका कोणत्या याविषयी जाणून घेऊया.
बाजारात किंवा दुकानात गेल्यावर सर्वात मोठा प्रश्न पडतो तो म्हणजे, नेमका किती ‘टन’ (Ton) चा एसी घ्यायचा? बऱ्याचदा आपण केवळ डिस्काउंट किंवा कंपनी पाहून एसी घेतो आणि खोलीच्या आकाराकडे दुर्लक्ष करतो. चुकीच्या क्षमतेचा एसी घेतल्यास कूलिंग तर नीट होत नाहीच, शिवाय महिन्याचे वीज बिलही हजारो रुपयांनी वाढते. त्यामुळे पैसे वाचवायचे असतील तर योग्य एसी कसा निवडायचा, हे समजून घेणे अत्यंत गरजेचे आहे.
एसीमध्ये ‘टन’ म्हणजे नक्की काय?
बऱ्याच जणांना वाटते की 1 टन किंवा 2 टन म्हणजे एसीचे वजन असेल. पण तसे अजिबात नाही! ‘टन’ म्हणजे एसीची खोली थंड करण्याची क्षमता (Cooling Capacity). एका तासात एसी खोलीतील किती उष्णता बाहेर काढतो, हे यावरून ठरते. उष्णता मोजण्यासाठी BTU (British Thermal Unit) हे एकक वापरले जाते. जितके टन जास्त, तितकी एसीची थंड करण्याची ताकद जास्त असते.
खोलीच्या आकारानुसार असा निवडा योग्य AC:
1 टन एसी (1 Ton AC): जर तुमच्या खोलीचा आकार 100 ते 130 चौरस फूट (Sq Ft) असेल, तर 1 टन एसी तुमच्यासाठी पुरेसा आहे. लहान बेडरूम, गेस्ट रूम किंवा स्टडी रूमसाठी हा सर्वोत्तम पर्याय आहे. याची कूलिंग क्षमता सुमारे 12,000BTU असते.
1.5 टन एसी (1.5 Ton AC): 130 ते 200 चौरस फुटांच्या खोलीसाठी 1.5 टन क्षमतेचा एसी योग्य मानला जातो. सामान्य आकाराची मास्टर बेडरूम किंवा मध्यम आकाराच्या हॉलसाठी हा एसी कमी वेळेत उत्तम कूलिंग देतो. याची क्षमता सुमारे 18,000 BTU असते.
2 टन एसी (2 Ton AC): तुमची खोली 200 ते 300 चौरस फुटांपेक्षा मोठी असेल, तर तुम्हाला 2 टनाचा एसी घ्यावा लागेल. मोठ्या ड्रॉईंग रूमसाठी किंवा दुकानांसाठी हा चांगला पर्याय आहे.
खरेदी करताना ‘या’ अतिरिक्त गोष्टींकडेही लक्ष द्या:
केवळ खोलीचा आकारच नाही, तर खोली कुठे आहे हेही खूप महत्त्वाचे असते. जर तुमची खोली सर्वात वरच्या मजल्यावर असेल आणि छतावर थेट कडक ऊन पडत असेल, किंवा खोलीत मोठ्या काचेच्या खिडक्या असतील, तर नेहमीपेक्षा थोड्या जास्त क्षमतेचा (उदा. 1 टनाऐवजी 1.5 टन) एसी निवडा. तसेच, वीज वाचवण्यासाठी सध्या ‘इन्व्हर्टर एसी’ (Inverter AC) आणि 5-स्टार रेटिंग असलेल्या मॉडेल्सना प्राधान्य द्या. सुरुवातीला हे थोडे महाग वाटले तरी, दीर्घकाळात ते विजेची मोठी बचत करतात.
स्वस्तात मिळतोय म्हणून क्षमतेपेक्षा लहान एसी घेऊ नका, कारण खोली थंड करण्यासाठी त्याला सतत पूर्ण क्षमतेने काम करावे लागते आणि तो जास्त वीज खातो. त्यामुळे स्मार्ट ग्राहक बना आणि योग्य नियोजन करूनच एसी खरेदी करा.
