BMC Water Bill | उन्हाळ्याची सुरुवात होत असतानाच BMC ने पाणी बिल थकबाकीदारांविरोधात कठोर भूमिका घेतली आहे. महानगरपालिकेच्या जल विभागाने शहरातील थकीत पाणी बिलांची संख्या वाढत असल्यामुळे नागरिकांना अंतिम इशारा दिला आहे. 31 मार्चपर्यंत थकबाकी भरली नाही तर संबंधित घर, इमारत किंवा सोसायटीचा पाणीपुरवठा थेट बंद केला जाईल, असा स्पष्ट इशारा प्रशासनाकडून देण्यात आला आहे. त्यामुळे अनेक नागरिकांमध्ये चिंता निर्माण झाली आहे.
महानगरपालिकेच्या अधिकाऱ्यांनी सांगितले की, शहरातील अनेक भागांमध्ये पाणी बिलांची थकबाकी मोठ्या प्रमाणात वाढली आहे. विशेषतः काही गृहनिर्माण सोसायट्या आणि झोपडपट्टी भागांमध्ये नियमितपणे बिल न भरण्याची समस्या कायम आहे. अधिकाऱ्यांच्या मते, झोपडपट्टी भागांमध्ये केवळ सुमारे 50 टक्के नागरिकच पाणी बिल भरतात. त्यामुळे महसूल वसुली सुधारण्यासाठी आणि पाणीपुरवठा सुरळीत ठेवण्यासाठी हा निर्णय घेण्यात आला आहे.
पाणी मीटरसंदर्भात कडक नियम लागू :
महानगरपालिकेने पाणी मीटरबाबतही कडक नियमांची अंमलबजावणी सुरू केली आहे. नागरिकांनी घरातील पाणी मीटर व्यवस्थित स्थितीत ठेवणे बंधनकारक करण्यात आले आहे. जर मीटर खराब असेल आणि सहा महिन्यांच्या आत त्याची दुरुस्ती किंवा बदल करण्यात आला नाही, तर त्या घराला दुप्पट पाणी वापराचे बिल आकारले जाईल, असा इशारा प्रशासनाने दिला आहे. (BMC Water Bill)
2011 मधील जल प्रमाण आणि सांडपाणी व्यवस्थापन नियमांमध्ये बदल करून खराब किंवा वाचन न होणाऱ्या खासगी मीटरांवर कठोर कारवाई करण्याचा निर्णय घेण्यात आला आहे. काही ठिकाणी मीटर चोरीला जाणे, जाणीवपूर्वक काढून टाकणे किंवा जमिनीत गाडून ठेवणे अशा प्रकारांमुळे बिलिंग प्रक्रियेत अडथळे निर्माण होत असल्याचे अधिकाऱ्यांनी स्पष्ट केले.
BMC Water Bill | नियम मोडल्यास अतिरिक्त शुल्क :
नवीन नियमांनुसार सहा महिन्यांपेक्षा जास्त काळ मीटर रीडिंगसाठी उपलब्ध नसल्यास त्या ग्राहकांवर दुप्पट शुल्क आकारले जाईल. तसेच दुरुस्ती आवश्यक असलेल्या खराब मीटरसाठी 25 टक्के अतिरिक्त शुल्क आकारण्याची तरतूद करण्यात आली आहे. मात्र मीटर दुरुस्ती किंवा बदलण्याच्या कालावधीत नागरिकांवर कोणतेही अतिरिक्त शुल्क लादले जाणार नाही, असेही प्रशासनाने स्पष्ट केले आहे. (Mumbai Water Supply)
हे सुधारित नियम 1 जुलै 2025 पासून लागू करण्यात आले आहेत. मात्र अनेक ग्राहकांना अजूनही या बदलांची माहिती नसल्याचे महानगरपालिकेच्या निदर्शनास आले आहे. त्यामुळे सर्व नागरिक आणि सहकारी गृहनिर्माण संस्थांना खराब मीटर तात्काळ दुरुस्त किंवा बदलण्याचे आवाहन करण्यात आले आहे, जेणेकरून जादा बिल टाळता येईल आणि पाणीपुरवठा सुरळीत राहील.
