Krushna Andhale | बीड (Beed) जिल्ह्यातील मस्साजोग (Massajog) येथील सरपंच संतोष देशमुख (Santosh Deshmukh) यांच्या निर्घृण हत्येनंतर राज्यभरात तीव्र संताप उसळला होता. या प्रकरणात तपासाची दिशा आणि आरोपींविषयीच्या कारवाईबाबत अनेक प्रश्न उपस्थित होत असताना, संतोष देशमुख यांचे बंधू धनंजय देशमुख (Dhananjay Deshmukh) यांनी आणखी एक धक्कादायक माहिती समोर आणली आहे. विशेषतः फरार आरोपी कृष्णा आंधळे (Krushna Andhale) संदर्भातील दाव्यामुळे खळबळ उडाली आहे.
तपासातील घडामोडी आणि न्यायालयीन प्रक्रिया :
या खूनप्रकरणानंतर सुरुवातीला आरोपींना संरक्षण दिले जात असल्याचा आरोप करण्यात आला होता. विविध ठिकाणी मोर्चे निघाल्यानंतर पोलीस यंत्रणा सक्रिय झाल्या आणि काही आरोपींना अटक करण्यात आली. या कटाचा सूत्रधार वाल्मिक कराड (Walmik Karad) असल्याचा दावा करण्यात आला. मात्र कृष्णा आंधळे अद्याप पोलिसांच्या हाती लागलेला नाही.
धनंजय देशमुख यांनी सांगितले की, काही दिवसांपूर्वी फॉरेन्सिक लॅबकडे (Forensic Lab) पाठवण्यात आलेल्या लॅपटॉपमधील सर्व माहिती पूर्णपणे पुनर्प्राप्त करण्यात आली आहे. पुढील सुनावणीत सर्व साक्षीदारांची यादी न्यायालयासमोर सादर केली जाणार आहे. गेल्या काही दिवसांपासून आरोपपत्र दाखल होऊ नये म्हणून विलंब केला जात असल्याचा आरोप त्यांनी केला. मात्र आता दोषारोप निश्चित झाला असून, लवकरच पुरावे आणि साक्षीदारांची अधिकृत यादी सादर केली जाईल, अशी माहिती त्यांनी दिली. ही केस शक्य तितक्या लवकर निकाली निघावी, अशी त्यांची मागणी आहे.
Krushna Andhale | संपत्ती जप्तीचा पाठपुरावा आणि फरार आरोपीचा दावा :
येत्या सहा तारखेला होणाऱ्या सुनावणीत आरोपींची मालमत्ता जप्त करण्याबाबत जोरदार पाठपुरावा केला जाणार असल्याचे देशमुख यांनी स्पष्ट केले. विशेष सरकारी वकील उज्ज्वल निकम (Ujjwal Nikam) तसेच सहाय्यक सरकारी वकिलांनी यासाठी प्रयत्न सुरू केले आहेत. आरोपींची गोठवलेली खाती लवकरात लवकर जप्त व्हावीत यासाठी पुढील पावले उचलली जातील, असे त्यांनी सांगितले.
दरम्यान, फरार असलेला कृष्णा आंधळे (Krushna Andhale) गेल्या सहा महिन्यांत तीन वेळा आपल्या गावात येऊन गेल्याची माहिती मिळाल्याचा मोठा दावा देशमुख यांनी केला. ही माहिती सीआयडी कार्यालयाला (CID Office) देण्यात आली असून, संबंधित अधिकाऱ्यांनीही आरोपी गावात आल्याची बाब मान्य केल्याचे त्यांनी सांगितले. मात्र आरोपी मोबाईलचा वापर करत नसल्यामुळे तपास यंत्रणांना त्याचा माग काढण्यात अडचणी येत आहेत. या सर्व पार्श्वभूमीवर आपल्या कुटुंबाच्या जीविताला धोका असल्याची भीती व्यक्त करत, कृष्णा आंधळे याला तातडीने अटक करून कठोर कारवाई करावी, अशी मागणी त्यांनी केली.
