Baramati Bypoll 2026 | राज्याचे माजी उपमुख्यमंत्री अजित पवार (Ajit Pawar) यांच्या निधनामुळे रिक्त झालेल्या बारामती (Baramati) विधानसभा मतदारसंघाच्या पोटनिवडणुकीचे बिगुल वाजले आहे. या प्रतिष्ठेच्या लढाईसाठी येत्या २३ एप्रिल रोजी मतदान प्रक्रिया पार पडणार असून, ४ मे रोजी निवडणुकीचा निकाल स्पष्ट होईल. राष्ट्रवादी काँग्रेसकडून (NCP) राज्याच्या विद्यमान उपमुख्यमंत्री सुनेत्रा पवार (Sunetra Pawar) या रिंगणात उतरल्या असून, ही निवडणूक बिनविरोध होण्याची शक्यता आता पूर्णपणे मावळली आहे.
काँग्रेसचा निवडणुकीत प्रवेश आणि राजकीय समीकरणे
सुरुवातीला ही पोटनिवडणूक बिनविरोध होईल, अशी राजकीय वर्तुळात चर्चा होती. मात्र, आतापर्यंत तब्बल १९ उमेदवारांनी आपले नामांकन अर्ज दाखल केल्याने बारामतीचे मैदान तापले आहे. महाविकास आघाडीतील (MVA) घटक पक्ष असलेल्या उद्धव ठाकरे गट (Shiv Sena UBT) आणि शरद पवार गट (NCP Sharadchandra Pawar) यांनी सुनेत्रा पवार यांना पाठिंबा जाहीर केला असला, तरी काँग्रेसने (Congress) स्वबळावर लढण्याचा पवित्रा घेतला आहे. या निर्णयामुळे बारामतीत तिरंगी किंवा बहुरंगी लढत पाहायला मिळणार आहे.
काँग्रेस पक्षाकडून या जागेसाठी अर्चना पाटील (Archana Patil) आणि डॉ. विजयकुमार पिसे (Dr. Vijaykumar Pise) यांच्यासह अनेक नावांची चर्चा सुरू होती. मात्र, पक्षाने आता आकाश मोरे (Akash More) यांच्या नावावर शिक्कामोर्तब केल्याचे समजते. आकाश मोरे यांच्या माध्यमातून काँग्रेसने बारामतीमध्ये धनगर समाजाचा (Dhangar Community) चेहरा समोर आणून सुनेत्रा पवार यांच्यासमोर मोठे आव्हान उभे करण्याचा प्रयत्न केला आहे. दिल्लीतून अधिकृत घोषणा झाल्यानंतर प्रदेशाध्यक्ष हर्षवर्धन सपकाळ (Harshvardhan Sapkal) यांच्या उपस्थितीत मोरे आपला उमेदवारी अर्ज दाखल करतील.
रिंगणातील प्रमुख उमेदवार आणि अपक्ष
बारामती विधानसभा पोटनिवडणुकीसाठी (Baramati Bypoll 2026) प्रशासनाकडे आतापर्यंत अनेक अर्ज प्राप्त झाले आहेत. यामध्ये प्रामुख्याने हिंदुस्तान जनता पार्टीचे (Hindustan Janata Party) सतिश कदम आणि न्यू राष्ट्रीय समाज पार्टीचे (New Rashtriya Samaj Party) राघू घटुकडे यांचा समावेश आहे. विशेष म्हणजे, साताऱ्याचे प्रसिद्ध अपक्ष उमेदवार अभिजीत बिचुकले (Abhijit Bichukle) यांनीही या निवडणुकीत शड्डू ठोकला असून त्यांनी दोन अर्ज दाखल केले आहेत.
इतर उमेदवारांमध्ये गजानन गवळी, त्रिशाला कांबळे, रजाक मुलाणी आणि दादा थोरात यांसारख्या स्थानिक अपक्ष चेहऱ्यांचा समावेश आहे. एकूण १९ उमेदवारांमुळे मतदानाची टक्केवारी आणि निकालावर मोठा परिणाम होऊ शकतो. बारामती हा पवारांचा बालेकिल्ला मानला जात असल्याने, अजित पवारांच्या निधनानंतर होणाऱ्या या पहिल्याच निवडणुकीत मतदार कोणाच्या पारड्यात वजन टाकतात, याकडे संपूर्ण महाराष्ट्राचे लक्ष लागून राहिले आहे.
