Baby fever | बदलत्या हवामानामुळे लहान मुलांना आजारपणाचा धोका वाढतो. विशेषतः थंडीच्या दिवसात सर्दी, खोकला आणि ताप येणे सामान्य आहे. मात्र, बाळाला ताप आल्यावर काळजी घेताना अनेक पालक नकळत काही चुका करतात, ज्यामुळे बाळाच्या आरोग्यावर विपरीत परिणाम होऊ शकतो. त्यामुळे योग्य माहिती असणे गरजेचे आहे. (Baby fever Mistakes)
तापमापन आणि औषधोपचार: अचूकता महत्त्वाची
अनेक पालक बाळाच्या अंगाला हात लावून तापाचा अंदाज घेतात, पण ही पद्धत पूर्णपणे चुकीची आहे. बाळाचा ताप नेहमी थर्मामीटर वापरूनच मोजावा. यामुळे शरीराचे अचूक तापमान कळते, जे डॉक्टरांना योग्य निदान आणि उपचार करण्यासाठी मदत करते. अचूक तापमानाची नोंद घेणे आवश्यक आहे.
सर्वात मोठी चूक म्हणजे डॉक्टरांच्या सल्ल्याशिवाय बाळाला घरात असलेली औषधे देणे. अनेक पालकांना वाटते की अँटीबायोटिक्समुळे ताप लवकर उतरतो, पण डॉक्टरांच्या सल्ल्याशिवाय अँटीबायोटिक्स देणे बाळासाठी हानिकारक ठरू शकते. तसेच, एकाच वेळी दोन प्रकारची औषधे देणेही धोकादायक असू शकते. त्यामुळे नेहमी बालरोगतज्ज्ञांचा सल्ला घ्यावा. (Baby fever Mistakes)
Baby fever | आहार, कपडे आणि स्पंजिंग: योग्य पद्धत कोणती?
बाळाला ताप असताना खाण्याची इच्छा नसल्यास त्याला जबरदस्ती खाऊ घालू नये. अशा वेळी बाळाला हायड्रेटेड ठेवणे महत्त्वाचे असते. त्यासाठी ओआरएस (ORS), नारळ पाणी किंवा सूप यांसारखे द्रव पदार्थ द्यावेत. बाळ सहा महिन्यांपेक्षा लहान असेल, तर केवळ आईचे दूध पुरेसे आहे.
या काळात मुलांना जंक फूड देण्याचा हट्ट टाळावा. त्याऐवजी उपमा, मऊ खिचडी, सूप असे हलके आणि पचायला सोपे अन्न द्यावे. ताप उतरवण्यासाठी बाळाला स्पंजिंग करताना कोमट पाण्याचा वापर करावा, थंड पाणी वापरू नये. तसेच, फक्त कपाळावर पट्टी न ठेवता मान, पोट, पाठ आणि मांड्यांवरही कोमट पाण्याची पट्टी ठेवावी. बाळाला हलके आणि सुती कपडे घालावेत, जेणेकरून शरीरातील उष्णता सहज बाहेर पडेल. जर बाळाला वारंवार उलट्या, जुलाब, त्वचेवर पुरळ येणे, डिहायड्रेशनची लक्षणे दिसत असतील किंवा ताप खूप जास्त असेल, तर तात्काळ डॉक्टरांशी संपर्क साधावा.
