Monsoon Update | राज्यात जुलै महिन्यात दमदार पाऊस झाल्यानंतर ऑगस्टच्या सुरुवातीला काही भागांत पावसाचा जोर कमी झाल्याचे चित्र आहे. तरीही IMD ने 3 ऑगस्टसाठी कोकण, घाटमाथा आणि विदर्भातील काही भागांमध्ये जोरदार पावसाचा इशारा दिला आहे. उर्वरित राज्यात हलका ते मध्यम पाऊस आणि ढगाळ वातावरण राहण्याचा अंदाज हवामान विभागाने वर्तवला आहे.
कोकण, उत्तर महाराष्ट्र आणि पश्चिम भागातील स्थिती :
गेल्या काही दिवसांत कोकणात मुसळधार पाऊस पडला होता. आता त्याचा वेग काहीसा मंदावल्याने बहुतांश ठिकाणी हवामानात सुधारणा होताना दिसत आहे. पालघर (Palghar), ठाणे (Thane) आणि मुंबई (Mumbai) या भागांसाठी कोणताही इशारा देण्यात आलेला नाही. मात्र रायगड (Raigad) आणि रत्नागिरी (Ratnagiri) जिल्ह्यांसाठी यलो अलर्ट जारी करण्यात आला असून काही ठिकाणी जोरदार ते मुसळधार पावसाच्या सरी कोसळण्याची शक्यता व्यक्त करण्यात आली आहे. हवामान विभागाच्या अंदाजानुसार पुढील काही दिवसांत कोकणातील पावसाचा जोर आणखी कमी होऊ शकतो.
उत्तर महाराष्ट्रात नाशिक (Nashik) जिल्ह्यातील घाटमाथ्यासाठी यलो अलर्ट लागू करण्यात आला आहे. नाशिकसह धुळे (Dhule), नंदुरबार (Nandurbar) आणि जळगाव (Jalgaon) जिल्ह्यांत हलका ते मध्यम स्वरूपाचा पाऊस पडण्याचा अंदाज आहे. त्याचवेळी पश्चिम महाराष्ट्रात पुणे (Pune) आणि सातारा (Satara) जिल्ह्यांच्या घाटमाथ्यावरही यलो अलर्ट देण्यात आला आहे.
Monsoon Update | मराठवाडा आणि विदर्भासाठी हवामानाचा अंदाज :
मराठवाड्यात छत्रपती संभाजीनगर (Chhatrapati Sambhajinagar), जालना (Jalna), परभणी (Parbhani), बीड (Beed), हिंगोली (Hingoli), नांदेड (Nanded), लातूर (Latur) आणि धाराशिव (Dharashiv) जिल्ह्यांसाठी कोणताही हवामान इशारा जारी करण्यात आलेला नाही. या संपूर्ण विभागात हलका पाऊस, दमट वातावरण आणि ढगाळ हवामान राहण्याची शक्यता आहे. मात्र अपेक्षेइतका पाऊस न झाल्याने मराठवाड्यात अद्यापही पावसाची तूट कायम आहे. त्यामुळे खरीप हंगामातील पिकांसाठी आवश्यक असलेल्या पावसाची प्रतीक्षा शेतकरी करत असून आगामी काही दिवसांच्या हवामानाकडे त्यांचे लक्ष लागले आहे.
विदर्भात अकोला (Akola), भंडारा (Bhandara), चंद्रपूर (Chandrapur), गडचिरोली (Gadchiroli), गोंदिया (Gondia) आणि वर्धा (Wardha) या सहा जिल्ह्यांसाठी यलो अलर्ट जाहीर करण्यात आला आहे. या भागांमध्ये काही ठिकाणी जोरदार पावसाचा अंदाज आहे. तर बुलढाणा (Buldhana), नागपूर (Nagpur) आणि यवतमाळ (Yavatmal) जिल्ह्यांत हलका ते मध्यम पाऊस पडण्याची शक्यता आहे.
