Marathi Language |  प्रवास करताना गावांची ओळख सहज होण्यासाठी दुकाने, हॉटेल्स आणि व्यावसायिक आस्थापनांवरील पाट्यांवर (signboards) गावाचे नाव असणे आवश्यक आहे. मात्र, अनेक ठिकाणी या नियमाचे पालन होताना दिसत नाही. बहुतांश ठिकाणी पाट्यांवर गावाचे नाव नसते आणि मराठी भाषेत पाट्या लावण्याचा नियम असूनही, इंग्रजी अक्षरांचा वापर मोठ्या प्रमाणात होत आहे.

गावाचे नाव नसल्याने प्रवाशांची गैरसोय

महामार्गावर किंवा ग्रामीण भागात प्रवास करताना, अनेक प्रवासी अनोळखी ठिकाणी पोहोचतात. अशावेळी दुकानांवरील पाट्यांवर गावाचे नाव नसल्यामुळे, ते नेमके कोणत्या गावात आहेत, हे समजत नाही.

प्रवाशांना, विशेषतः ज्येष्ठ नागरिकांना इंग्रजी पाट्या वाचता येत नसल्यामुळे अधिकच त्रास होतो. महाराष्ट्र शासनाच्या २०२२ च्या आदेशानुसार, सर्व दुकाने, व्यावसायिक आस्थापने आणि व्यापारी संकुलांवरील पाट्या मराठीत आणि देवनागरी लिपीत असणे बंधनकारक आहे, पण त्याची अंमलबजावणी होताना दिसत नाही.

प्रशासनाकडून कारवाई नाही

नियमांचे उल्लंघन करणाऱ्यांवर कारवाई करण्यासाठी, महापालिका आणि स्थानिक प्रशासनाने विशेष पथके तयार करणे अपेक्षित आहे, मात्र,अशी कोणतीही ठोस अंमलबजावणी होताना दिसत नाही. त्यामुळे अनेक व्यावसायिक या नियमांकडे दुर्लक्ष करत आहेत.

यामुळे प्रवाशांना ‘गुगल मॅप’वर (Google Map) अवलंबून राहावे लागते किंवा स्थानिकांना विचारावे लागते. रात्रीच्या वेळी किंवा इंटरनेट कनेक्टिव्हिटी नसताना ही समस्या गंभीर बनते. अनेक ठिकाणी रस्त्यांवरील मैलाचे दगडही गायब झाले आहेत, ज्यामुळे प्रवाशांना आणखीनच त्रास होतो.

Title : Village Names and Marathi Language Missing from Signboards