Rohit Aarya | मुंबईच्या पवई भागात नुकतीच घडलेली रोहित आर्य (Rohit Aarya) एनकाउंटरची घटना सध्या संपूर्ण राज्यात चर्चेचा विषय बनली आहे. महावीर क्लासिक या इमारतीतील एका स्टुडिओमध्ये रोहित आर्य हा व्यक्ती राहत होता. त्याने त्या स्टुडिओमध्ये सुमारे वीस लोक त्यापैकी सतरा मुलं ठेवली होती.
मुंबई गुन्हे शाखा करणार प्रकरणाची चौकशी
ही माहिती पोलिसांना मिळाल्यानंतर पवई पोलिसांनी त्या ठिकाणी धाड टाकली. तपास आणि चौकशी सुरू असतानाच परिस्थिती तणावपूर्ण झाली आणि पोलिस उपनिरीक्षक अमोल वाघमारे यांनी गोळी झाडली. ती थेट रोहित आर्यच्या छातीत लागली आणि तो जागीच मरण पावला. या घटनेनंतर अनेक शंका उपस्थित झाल्या. पोलिसांनी गोळी झाडण्याची खरंच गरज होती का, परिस्थिती इतकी बिकट झाली होती का, आर्यला जिवंत पकडण्याचा प्रयत्न झाला होता का या सगळ्याची चौकशी आता मुंबई गुन्हे शाखेकडे सोपवण्यात आली आहे. फॉरेन्सिक टीम घटनास्थळावरून पुरावे गोळा करत आहे.(Rohit Aarya)
शिक्षण अधिकाऱ्यांचीही होणार चौकशी
घटनेचा आणखी एक महत्त्वाचा पैलू म्हणजे रोहित आर्य आणि शिक्षण विभागातील वाद. आर्यने काही काळापूर्वी असा दावा केला होता की त्याने “माझी शाळा, स्वच्छ शाळा” आणि “मुख्यमंत्री माझी शाळा” या योजनांसाठी कल्पना आणि संकल्पना दिल्या होत्या, पण शासनाने त्याला ना मान्यता दिली ना मोबदला. त्याचा दावा होता की शिक्षण विभागाने त्याच्या कल्पना वापरून त्या योजना राबवल्या. या दाव्यानंतर आता शिक्षण विभागातील काही अधिकाऱ्यांवरही चौकशीची शक्यता निर्माण झाली आहे. (Rohit Aarya)
संपूर्ण प्रकरणामध्ये १७ मुलं त्या स्टुडिओमध्ये का ठेवली गेली होती, त्यांची काळजी कोण घेत होतं, त्यांच्या पालकांना माहिती होती का, या प्रश्नांचीही चौकशी सुरू आहे. बालकल्याण समिती आणि महिला व बालविकास विभाग या मुलांची चौकशी करून त्यांच्या पुनर्वसनाची जबाबदारी घेणार आहेत.
ही घटना केवळ एका व्यक्तीच्या मृत्यूपुरती मर्यादित नाही, तर ती प्रशासनाच्या अनेक स्तरांवर प्रश्न उपस्थित करते पोलिसांच्या कार्यपद्धतीवर, सरकारी योजनांतील पारदर्शकतेवर, आणि समाजातल्या दुर्बल घटकांच्या सुरक्षिततेवर. गुन्हे शाखेचा अहवाल आल्यानंतर पुढे कोणावर जबाबदारी ठरणार, आणि या घटनेचा शेवट नेमका कसा होईल, हे पाहणं आता महत्त्वाचं ठरणार आहे.
