अतिमुसळधार पावसाचा इशारा; ‘या’ जिल्ह्यांना अलर्ट, जाणून घ्या आजचा हवामान विभागाचा अंदाज

Rain Update | राज्यात १ जुलैपासून सुरू असलेल्या मुसळधार पावसाने प्रचंड धुमाकूळ घातला आहे. संपूर्ण जून महिन्यात जेवढा पाऊस पडतो, तेवढा पाऊस यंदा अवघ्या ६ दिवसांमध्ये कोसळल्याने अनेक भागांत पूरस्थिती निर्माण झाली आहे. सखल भागात गेल्या ५ दिवसांपासून पाणी साचले असून जनजीवन विस्कळित झाले आहे. मुंबईत झालेल्या अतिवृष्टीमुळे मुंबईची जीवनवाहिनी असलेल्या लोकल रेल्वे सेवेलाही मोठा फटका बसला आहे. दरम्यान, २ जून रोजी केरळमध्ये दाखल झालेला मॉन्सून अरबी समुद्रात रेंगाळल्याने जूनअखेरपर्यंत पावसाने ओढ दिली होती; मात्र जुलैच्या सुरुवातीलाच पावसाने संपूर्ण राज्याला झोडपून काढले आहे.

मुख्य जलवाहिनी फुटली; बेतुरकर पाड्यात पावसाचे पाणी उकळून पिण्याची वेळ

ठाणे जिल्ह्यात झालेल्या मुसळधार पावसामुळे उल्हास नदीच्या (Ulhas River) पाणी पातळीत प्रचंड वाढ होऊन पूर आला आहे. या पुरामुळे मोहने जलशुद्धीकरण केंद्रातील (Mohane Water Purification Plant) पंपांमध्ये मोठ्या प्रमाणात गाळ साचला आहे. त्यातच नदीच्या तीव्र प्रवाहामुळे कल्याण-डोंबिवली महानगरपालिकेची (KDMC) मुख्य जलवाहिनी फुटल्याने गेल्या ४८ तासांपासून शहराचा पाणीपुरवठा पूर्णपणे ठप्प झाला आहे.

या तांत्रिक बिघाडामुळे कल्याण आणि डोंबिवलीच्या पूर्व-पश्चिम भागातील हजारो कुटुंबांना तीव्र पाणीटंचाईचा सामना करावा लागत आहे. बेतुरकर पाडा (Beturkar Pada) परिसरातील परिस्थिती अत्यंत गंभीर असून, तेथील महिला बादल्या, टब आणि ड्रम घेऊन रस्त्यावर उतरल्या आहेत. पाणी उपलब्ध नसल्याने अनेक नागरिक नाईलाजास्तव पावसाचे पाणी साठवून, ते गाळून आणि उकळून पिण्यासाठी वापरत आहेत.

हवामान विभागाचा ताजा अंदाज; ‘या’ भागांना सतर्कतेचा इशारा

हवामान विभागाने (IMD) दिलेल्या माहितीनुसार, मॉन्सून आता संपूर्ण देशात सक्रिय झाला असून पावसासाठी अनुकूल वातावरण निर्माण झाले आहे. गुजरात आणि केरळच्या किनारपट्टीवर कमी दाबाचा पट्टा सक्रिय असल्याने आजही राज्याच्या विविध भागांत पावसाचा जोर कायम राहणार आहे.

घाटमाथ्यावर अतिमुसळधार: पुणे (Pune) आणि सातारा (Satara) जिल्ह्यांच्या घाटमाथा परिसरात आज अतिमुसळधार पावसाचा इशारा देण्यात आला आहे.

कोकणात येलो अलर्ट: मुंबई, ठाणे आणि पालघरमध्ये सकाळपासून पावसाने काहीशी विश्रांती घेतली असली, तरी रायगड आणि रत्नागिरीसह संपूर्ण कोकण किनारपट्टीवर आज ‘येलो अलर्ट’ (Yellow Alert) जारी करण्यात आला आहे.

उत्तर महाराष्ट्र आणि विदर्भ: जळगाव, धुळे आणि नाशिकच्या घाटमाथ्यावर आज हलक्या ते मध्यम स्वरूपाच्या पावसाची शक्यता आहे. तर विदर्भ आणि मराठवाड्यातील काही जिल्ह्यांमध्ये विजांच्या कडकडाटासह वादळी पावसाचा अंदाज वर्तवण्यात आला आहे.

News Title: Rain update Maharashtra Monsoon Heavy Rain KDMC Water Crisis