जीभेवर दिसतात आजारांचे संकेत! ‘या’ लक्षणांकडे अजिबात दुर्लक्ष करू नका, तज्ज्ञांचा इशारा

Tongue Health | आपली जीभ केवळ अन्नाची चव ओळखण्याचे काम करत नाही, तर ती आपल्या शरीराच्या अंतर्गत आरोग्याचा आरसा देखील असते. जिभेचा रंग, तिचा पोत आणि त्यावर दिसणाऱ्या खुणा आपल्या आरोग्यातील विविध समस्यांचे संकेत देतात. प्रसिद्ध पोषणतज्ज्ञ श्वेता शाह यांनी एक विशेष व्हिडीओ शेअर करत, दररोज जिभेचे काळजीपूर्वक निरीक्षण केल्याने शरीरातील आजार कसे ओळखता येतात, याबद्दल सविस्तर माहिती दिली आहे.

त्यांच्या मते, दररोज सकाळी काहीही खाण्यापिण्यापूर्वी फक्त एक मिनिट आरशासमोर उभे राहून जीभ तपासल्यास आरोग्याबाबत अनेक महत्त्वाचे संकेत मिळू शकतात.

जिभेवरील ‘ही’ लक्षणे दुर्लक्षित करू नका

जिभेवर पांढरा थर

जर जिभेवर पांढऱ्या रंगाचा थर दिसत असेल, तर ते पचनसंस्था कमकुवत असल्याचे किंवा पचनशक्ती कमी झाल्याचे लक्षण असू शकते.

जिभेचा पुढील भाग लाल दिसणे

जीभ पुढच्या बाजूने लालसर दिसत असल्यास, शरीरात उष्णता वाढणे किंवा अॅसिडिटीचा त्रास असल्याचे संकेत असू शकतात.

कोरडी जीभ आणि मध्यभागी भेग

जर जीभ कोरडी वाटत असेल आणि तिच्या मध्यभागी खोल भेग दिसत असेल, तर याकडे गांभीर्याने पाहण्याची गरज आहे. अशा परिस्थितीत त्वरित डॉक्टरांचा सल्ला घेणे आवश्यक आहे.

या बदलांकडेही लक्ष द्या

पिवळसर जीभ – जिभेचा रंग पिवळा दिसत असल्यास, तोंडातील जिवाणूंची वाढ, धूम्रपान किंवा तोंडाची योग्य स्वच्छता न राखणे ही कारणे असू शकतात.

फिकट रंगाची जीभ – जीभ नेहमीपेक्षा अधिक फिकट दिसत असल्यास, शरीरात रक्ताची कमतरता म्हणजेच अॅनिमियाचे लक्षण असू शकते.

जांभळसर किंवा निळसर रंग – जिभेचा रंग जांभळा किंवा निळसर दिसत असल्यास, शरीरात ऑक्सिजनची कमतरता किंवा रक्ताभिसरणाशी संबंधित समस्या असण्याची शक्यता असते.

फोड, गाठी किंवा लाल – पांढरे ठिपके – जिभेवर वारंवार फोड येणे, गाठी निर्माण होणे किंवा लाल-पांढरे ठिपके दिसणे ही गंभीर आजारांची लक्षणे असू शकतात. काही प्रकरणांमध्ये ही तोंडाच्या कर्करोगाची सुरुवातीची चिन्हेही असू शकतात. त्यामुळे अशा लक्षणांकडे दुर्लक्ष न करता तज्ज्ञांचा सल्ला घ्यावा.

 

View this post on Instagram

 

A post shared by Shweta Shah (@shweta_shah_nutritionist)

तज्ज्ञांचा सल्ला

आरोग्य चांगले ठेवण्यासाठी नियमितपणे जिभेचे निरीक्षण करणे फायदेशीर ठरू शकते. मात्र, जिभेवरील कोणताही बदल हा आजाराचे निश्चित निदान नसतो. अशा लक्षणांबाबत शंका असल्यास डॉक्टरांचा सल्ला घेऊन योग्य तपासणी करून घेणे आवश्यक आहे.

News Title: Tongue Health Indicators Medical Symptoms Analysis