Thalapathy Vijay | तामिळनाडूच्या मुख्यमंत्रीपदाची शपथ घेतल्यानंतर पहिल्याच दिवशी टीव्हीके (TVK) प्रमुख विजय (Thalpathy Vijay) यांनी आपल्या धडाकेबाज निर्णयांनी राज्याच्या राजकारणात खळबळ उडवून दिली आहे. रविवारी त्यांनी आपल्या पहिल्याच अधिकृत आदेशावर स्वाक्षरी करत राज्यातील जनतेसाठी २०० युनिट मोफत वीज, ड्रग्ज माफियांच्या विरोधात विशेष कृती दल, आणि महिलांच्या सुरक्षेसाठी स्वतंत्र हेल्पलाइन व फोर्सची घोषणा केली आहे.
शिक्षण, आरोग्य आणि पायाभूत सुविधांवर भर
आपल्या पहिल्याच कार्यकाळात राज्याच्या मूलभूत गरजांवर लक्ष केंद्रित करणार असल्याचे विजय यांनी स्पष्ट केले आहे. त्यांचे सरकार प्रामुख्याने शिक्षण, आरोग्य सेवा आणि स्वच्छ पाणी यासारख्या महत्त्वाच्या प्रश्नांवर लक्ष घालणार आहे. राज्यातील शेतकरी आणि मच्छीमार बांधवांना दिलासा देत, त्यांच्या समस्या प्राधान्याने सोडवल्या जातील आणि सर्वांसाठी चांगले दिवस येतील, असे आश्वासन त्यांनी दिले.
भावूक भाषणाने जिंकली जनतेची मने
विजय यांनी आपल्या भाषणाची सुरुवात त्यांच्या नेहमीच्या आणि लोकप्रिय अशा ‘एन नेंजिल कुदियिरुक्कुम’ (En Nenjil Kudiyirukkum) या तमिळ संवादाने केली, ज्याने उपस्थितांमध्ये प्रचंड उत्साह निर्माण झाला. आपल्या संघर्षमय प्रवासाची आठवण करून देताना ते म्हणाले की, एका साध्या सहायक दिग्दर्शकाचा मुलगा आज राज्याचा मुख्यमंत्री झाला आहे. “मी गरिबी आणि भूक अत्यंत जवळून पाहिली आहे. मी कोणत्याही राजघराण्यातील नाही. आयुष्यात अनेक संकटांचा सामना केला आणि अनेकांकडून अपमानित झालो, परंतु तुम्ही मला तुमच्या मुलासारखे, भावासारखे स्वीकारले आणि हृदयात जागा दिली,” या शब्दांत त्यांनी जनतेचे आभार मानले.
माजी सरकारवर कठोर टीका आणि भ्रष्टाचाराला आळा घालण्याचा संकल्प
आपल्या भाषणात त्यांनी मागील डीएमके (DMK) सरकारवर जोरदार निशाणा साधला. “मागील सरकारने राज्याची तिजोरी पूर्णपणे रिकामी केली असून, १० लाख कोटी रुपयांच्या प्रचंड कर्जाच्या बोज्याखाली आम्ही सत्तेची सूत्रे हाती घेतली आहेत,” असा गंभीर आरोप त्यांनी केला. मात्र, यापुढे जनतेच्या पैशाची लूट अजिबात खपवून घेतली जाणार नाही आणि एकही नवा पैसा भ्रष्टाचार होऊ देणार नाही, असा ठाम विश्वास त्यांनी जनतेला दिला.
सहकाऱ्यांचे आभार आणि नव्या पर्वाची सुरुवात
राज्यात आता खऱ्या अर्थाने धर्मनिरपेक्ष आणि सामाजिक न्यायाचे नवे युग अवतरेल, असा विश्वास त्यांनी व्यक्त केला. या प्रवासात भक्कम साथ दिल्याबद्दल मुख्यमंत्री विजय यांनी काँग्रेस (Congress) नेते राहुल गांधी (Rahul Gandhi), प्रवीण चक्रवर्ती (Praveen Chakravarty), आणि डाव्या पक्षांचे (Left Parties) नेते एम. ए. बेबी (M. A. Baby) यांच्यासह आपल्या सर्व राजकीय मित्रपक्षांचे विशेष आभार मानले.
News Title: Thalapathy Vijay Signs First Order as TN CM
