Tahawwur Rana | 26/11 मुंबई हल्ल्याशी संबंधित मुख्य आरोपी तहव्वूर राणा (Tahawwur Rana) भारतात दाखल झाल्यानंतर दिल्लीच्या विशेष न्यायालयाने त्याला 18 दिवसांची एनआयए कोठडी सुनावली आहे. त्याच्या प्रत्यर्पणानंतर भारत-अमेरिका दहशतवाद विरोधी सहकार्याबद्दल अमेरिकेनेही प्रतिक्रिया दिली आहे. (Tahawwur Rana)

एनआयए मुख्यालयात चौकशी सुरू

तहव्वूर राणाविरोधातील रिमांड अर्जावर सुनावणी दिल्लीतील विशेष एनआयए न्यायालयात पार पडली. एनआयएनं त्याच्या 20 दिवसांच्या कोठडीची मागणी केली होती, मात्र अखेरीस विशेष न्यायाधीश चंदेर जित सिंह यांनी 18 दिवसांची कोठडी मंजूर केली. एनआयएच्या अधिकाऱ्यांनी पहाटे 2:30 वाजण्याच्या सुमारास त्याला दिल्लीतील मुख्यालयात दाखल केलं.

तहव्वूर राणाची चौकशी एनआयए मुख्यालयात सुरू होणार असून त्याच्याविरुद्ध लवकरच मुंबईत खटला चालवला जाणार आहे. या प्रकरणाची चौकशी एनआयएचे प्रमुख सदानंद दाते यांच्या नेतृत्वात केली जात आहे. उल्लेखनीय म्हणजे, दाते हे 26/11 च्या हल्ल्यात कामा रुग्णालयात दहशतवाद्यांशी झुंज देणाऱ्या अधिकाऱ्यांपैकी एक होते. त्या हल्ल्यात ते स्वतः जखमी झाले होते पण अनेकांचे प्राण वाचवले होते.

अमेरिकेची प्रतिक्रिया 

10 एप्रिल रोजी तहव्वूर राणाला अमेरिकेच्या ताब्यातून खासगी विमानाद्वारे भारतात आणण्यात आलं. तो 2008 च्या मुंबई हल्ल्यातील सहभागासाठी भारतात न्यायास सामोरा जाणार आहे. या हल्ल्यात 166 लोकांचा मृत्यू झाला होता, ज्यामध्ये सहा अमेरिकन नागरिकांचाही समावेश होता.

अमेरिकेच्या परराष्ट्र विभागाच्या प्रवक्त्या टॅमी ब्रूस यांनी या घटनेवर प्रतिक्रिया देताना म्हटलं की, “आम्हाला या गतिशीलतेचा अभिमान आहे.” त्यांनी पुढे सांगितले की, अमेरिका आणि भारत हे दहशतवादाविरुद्ध लढण्यासाठी कटिबद्ध आहेत. त्यांनी हेही स्पष्ट केलं की, भारताने या हल्ल्याच्या दोषींना न्यायासमोर आणण्यासाठी घेतलेल्या प्रयत्नांना अमेरिकेने सदैव पाठिंबा दिला आहे.

भारतात, विशेषतः 26/11 चा थरार अनुभवल्यानंतर, अनेक नागरिक तहव्वूर राणालाही कसाबप्रमाणे फाशीची शिक्षा व्हावी अशी भावना व्यक्त करत आहेत. त्याच्याविरुद्धची ही कार्यवाही भारतीय जनतेच्या न्यायाच्या अपेक्षेचा एक भाग मानली जात आहे.

 English Title: Tahawwur Rana Sent to 18-Day NIA Custody