Tabu | बॉलिवूडची (Bollywood) अष्टपैलू अभिनेत्री तब्बू (Tabu) पुन्हा एकदा दाक्षिणात्य चित्रपटसृष्टीत (South Indian Cinema) आपले नशीब आजमावण्यासाठी सज्ज झाली आहे. तब्बू नुकतीच 2025 मध्ये आलेल्या ‘दे दे प्यार दे 2’ (De De Pyaar De 2) या चित्रपटात दिसली होती, मात्र बॉक्स ऑफिसवर (Box Office) या चित्रपटाला फारसे यश मिळाले नाही. आता ती लवकरच अजय देवगणच्या (Ajay Devgn) ब्लॉकबस्टर ‘दृश्यम’ (Drishyam) फ्रँचायझीच्या तिसऱ्या भागात प्रेक्षकांच्या भेटीला येणार आहे. या बॉलिवूड प्रोजेक्ट्ससोबतच, ती तब्बल 6 वर्षांच्या प्रदीर्घ विश्रांतीनंतर साऊथमध्ये दमदार कमबॅक करत आहे.
तब्बू याआधी 2020 मध्ये सुपरहिट ‘अला वैकुंठपुर्रमुलू’ (Ala Vaikunthapurramuloo) या चित्रपटात दिसली होती. तिच्या या पुनरागमनामुळे चाहते प्रचंड उत्सुक आहेत.
विजय सेतुपतीसोबत पहिल्यांदाच पडद्यावर
तब्बूच्या या पुनरागमनाचे सर्वात मोठे वैशिष्ट्य म्हणजे ती एका अत्यंत महत्त्वाकांक्षी पॅन-इंडिया (Pan-India) प्रोजेक्टचा भाग असणार आहे. या चित्रपटात ती अशा एका दमदार अभिनेत्यासोबत स्क्रीन शेअर करणार आहे, ज्याने एकेकाळी शाहरुख खानला (Shah Rukh Khan) मोठ्या पडद्यावर तगडी टक्कर दिली होती. हा अभिनेता दुसरा तिसरा कोणी नसून साऊथचा सुपरस्टार विजय सेतुपती (Vijay Sethupathi) आहे. तब्बू आणि विजय सेतुपती ही दोन अभिनयाची दिग्गज व्यक्तिमत्त्वे पहिल्यांदाच एकत्र एकाच चित्रपटात काम करताना दिसणार आहेत, ज्यामुळे या चित्रपटाची चर्चा आतापासूनच शिगेला पोहोचली आहे.
प्रसिद्ध दिग्दर्शक पुरी जगन्नाथ (Puri Jagannadh) यांच्या आगामी ‘स्लमडॉग मिलियनेअर 33: टेम्पल रोड’ (Slumdog Millionaire 33: Temple Road) या ॲक्शन थ्रिलर चित्रपटात तब्बू महत्त्वपूर्ण भूमिकेत दिसणार आहे. पुरी जगन्नाथ आणि चार्मी कौर (Charmme Kaur) या चित्रपटाची सह-निर्मिती करत आहेत. विजय सेतुपतीच्या 48 व्या वाढदिवसाचे औचित्य साधून दिग्दर्शकांनी या चित्रपटाचे पहिले पोस्टर रिलीज केले होते, ज्यामध्ये तो एका अत्यंत शक्तिशाली आणि स्पष्टवक्त्या पात्रात दिसणार असल्याचे स्पष्ट झाले आहे. सध्या या चित्रपटाचे पोस्ट-प्रॉडक्शनचे (Post-production) काम वेगाने सुरू असून, तो या वर्षाच्या अखेरीस प्रदर्शित होण्याची दाट शक्यता आहे.
हा बहुचर्चित पॅन-इंडिया चित्रपट तमिळ, तेलुगू, हिंदी, कन्नड आणि मल्याळम अशा पाच प्रमुख भाषांमध्ये प्रदर्शित होणार आहे. या चित्रपटात विजय आणि तब्बू यांच्यासोबतच संयुक्ता (Samyuktha), दुनिया विजय (Duniya Vijay), ब्रह्माजी (Brahmaji) आणि व्हीटीव्ही गणेश (VTV Ganesh) यांच्यासारखी तगडी स्टारकास्ट आहे. तसेच, चित्रपटाला हर्षवर्धन रामेश्वर (Harshavardhan Rameshwar) यांचे संगीत लाभणार आहे.
