‘लग्न कधीच होणार नाही…’ सियाचे ‘ते’ चॅट पोलिसांच्या हाती; केतन अग्रवाल प्रकणात खळबळजनक ट्विस्ट!

Siya Goyal | पुण्यातील व्यावसायिक केतन अग्रवाल (Ketan Agrawal) यांच्या हत्येचा तपास करणाऱ्या पोलीस यंत्रणेच्या हाती आता एक अत्यंत महत्त्वपूर्ण तांत्रिक पुरावा लागला आहे. सूत्रांकडून मिळालेल्या माहितीनुसार, मुख्य संशयित सिया गोयल (Siya Goyal) आणि तिच्या एका मैत्रिणीमधील अत्यंत संशयास्पद संभाषण पोलिसांना सापडले आहे. हे संभाषण ‘स्नॅपचॅट’ (Snapchat) या सोशल मीडिया ॲपवर झाले असून, यावरून केतनचा मृत्यू हा अपघाती नसून अत्यंत थंड डोक्याने रचलेला कट असल्याचे स्पष्ट संकेत मिळत आहेत. या संवादाचा एक स्क्रीनशॉट समोर आला असून, त्यामध्ये ओळखपत्रांची मागणी आणि प्रवासाच्या तिकिटांविषयी चर्चा झाल्याचे दिसून येत आहे.

तिकिटांसाठी मागितले ओळखपत्र; विवाहाच्या पूर्वतयारीचा केवळ बनाव?

मिळालेल्या माहितीनुसार, २४ ते २६ मे दरम्यान झालेल्या या संभाषणात सियाने आपल्या मैत्रिणीकडे एका महत्त्वाच्या ओळखपत्राचे, म्हणजेच आधार कार्डचे (Aadhaar Card) दोन्ही बाजूंचे छायाचित्रे मागितली होती. विवाहाच्या तिकिटांचे आरक्षण करण्यासाठी ही कागदपत्रे हवी असल्याचे तिने सांगितले होते. मात्र, याच मेसेजमध्ये तिने पुढे लिहिले होते की, “ते लग्न तसेही कधीच होणार नाहीये, तरीही तू फोटो पाठवून ठेव.” यावर तिच्या मैत्रिणीने सदर छायाचित्रे ‘व्हॉट्सॲप’ (WhatsApp) या माध्यमातून पाठवल्याचे उत्तर दिले होते.

तपास यंत्रणांनी आता या संभाषणातील “ते लग्न कधीच होणार नाही” या वाक्यावर आपला तपास केंद्रित केला आहे. केतन अग्रवाल आणि त्यांच्या कुटुंबीयांना कोणताही संशय येऊ नये म्हणूनच केवळ विवाहाची तयारी आणि हवाई प्रवासाच्या तिकिटांचे हे नाटक रचले गेले होते का, या दृष्टीने पोलीस पडताळणी करत आहेत. हत्येपूर्वी स्वतःचा बचाव करण्यासाठी आणि तपास भरकटवण्यासाठी सिया आणि सह-आरोपी चेतन चौधरी (Chetan Choudhari) यांनी हा पूर्वनियोजित बनाव रचला होता का, याचा कसून शोध घेतला जात आहे.

डिजिटल फूटप्रिंट्स आणि फॉरेन्सिक अहवालाची प्रतीक्षा

सध्या या कथित स्नॅपचॅट संवादाच्या अधिकृत सत्यतेबाबत आणि त्याचा हत्येच्या गुन्ह्याशी असलेल्या थेट कायदेशीर संबंधाबाबत वरिष्ठ पोलीस अधिकाऱ्यांनी सावध भूमिका घेतली आहे. या डिजिटल पुराव्यांची सखोल तपासणी करण्यासाठी सायबर गुन्हे शाखा (Cyber Crime Branch) आणि फॉरेन्सिक पथकाची (Forensic Team) मदत घेतली जात आहे. या तांत्रिक तपासाचे अहवाल प्राप्त झाल्यानंतरच या कथित स्क्रीनशॉटमागील संपूर्ण सत्य समोर येईल आणि न्यायालयात हा पुरावा भक्कमपणे मांडता येईल, असे प्रशासनाकडून सांगण्यात आले आहे.

News Title: Siya Goyal Snapchat chat leak Ketan Agrawal death Case