Ketan Agarwal Case | केतन अग्रवाल हत्या प्रकरणात दररोज नवे खुलासे समोर येत असताना आता मुख्य आरोपी सिया गोयलच्या कुटुंबीयांनीही प्रथमच सार्वजनिक भूमिका मांडली आहे. सियाची आई पूजा गोयल यांनी माध्यमांशी संवाद साधताना अनेक चर्चांवर स्पष्टीकरण दिले. विशेषतः पोलिस कोठडीत सियाने बिअरची मागणी केल्याच्या चर्चेला त्यांनी स्पष्ट शब्दांत फेटाळून लावले.
तपासादरम्यान नवे खुलासे आणि कुटुंबीयांची भूमिका :
केतन अग्रवाल हत्या प्रकरणाचा तपास वेगाने सुरू असून सिया गोयल आणि चेतन चौधरी यांना पुन्हा न्यायालयात हजर करण्यात येणार आहे. यापूर्वी लोणावळा पोलिसांनी दोन्ही आरोपींना घटनास्थळ असलेल्या लोहगडावर नेऊन तपासाची प्रक्रिया पूर्ण केली. या प्रकरणात आणखी काही महत्त्वाचे पुरावे समोर येण्याची शक्यता असल्याने पोलिसांकडून दोघांच्या कोठडीत वाढ करण्याची मागणी केली जाऊ शकते.
तपासात समोर आलेल्या माहितीनुसार, केतनच्या हत्येचा कट आधीपासूनच आखण्यात आल्याचा संशय व्यक्त केला जात आहे. याआधीही केतनवर हल्ल्याचा प्रयत्न झाल्याची माहिती समोर आली आहे. दरम्यान, सियाच्या लग्नाबाबत तिच्या कुटुंबीयांनी अनेकदा विचारणा केली होती आणि तिने केतनसोबत विवाहास संमती असल्याचे सांगितले होते. दोघे अनेकदा एकत्र फिरत असत, तसेच केतनने तिचा वाढदिवस विशेष पद्धतीने साजरा केला होता. कुटुंबीयांशी बोलताना ती नेहमी आनंदी असल्याचे सांगत असे.
Ketan Agarwal Case | बिअरच्या चर्चेवर आईचे स्पष्टीकरण :
या प्रकरणात सिया गोयल, चेतन चौधरी यांच्यासह सियाचे आई-वडील आणि भाऊ साहिल यांचीही पोलिसांनी सखोल चौकशी केली. सिया आणि चेतन यांच्याशी संबंधित अनेक बाबींची पडताळणी करण्यात आली. त्यानंतर सियाचे वडील प्रवीण गोयल आणि आई पूजा गोयल यांनी दिलेल्या मुलाखतीत सुरू असलेल्या अनेक चर्चांवर आपली भूमिका स्पष्ट केली.
पोलिस कोठडीत असताना सियाने बिअरची मागणी केल्याचा दावा चुकीचा असल्याचे पूजा गोयल यांनी सांगितले. त्यांच्या म्हणण्यानुसार, चौकशीदरम्यान संबंधित पोलिस अधिकाऱ्यांनीच अशी कोणतीही मागणी सियाने केलेली नसल्याचे स्पष्ट केले. याशिवाय, सियाला शिक्षणात विशेष रस नसल्याची माहिती आपण आधीच केतनच्या कुटुंबीयांना दिली होती, असेही त्यांनी सांगितले.
