Sir Garfield Sobers Passed Away | क्रिकेटच्या मैदानावर आपल्या अष्टपैलू खेळाने लाखो चाहत्यांना मंत्रमुग्ध करणारा एक महान तारा अखेर कायमचा निखळला. क्रिकेट इतिहासातील सर्वश्रेष्ठ ऑलराउंडर म्हणून ओळखले जाणारे वेस्ट इंडिजचे दिग्गज सर गारफील्ड ‘गॅरी’ सोबर्स यांचे वयाच्या 89 व्या वर्षी निधन झाले. अवघ्या काही दिवसांनंतर म्हणजेच 28 जुलै रोजी त्यांचा 90 वा वाढदिवस साजरा होणार होता. त्यांच्या निधनाच्या वृत्ताने संपूर्ण क्रिकेटविश्व शोकसागरात बुडाले असून, जगभरातून त्यांना श्रद्धांजली वाहिली जात आहे.
क्रिकेट वेस्ट इंडिजने सोशल मीडियावर अधिकृत पोस्ट शेअर करत सर गॅरी सोबर्स यांच्या निधनाची माहिती दिली. त्यांच्या निधनानंतर माजी आणि विद्यमान क्रिकेटपटूंसह चाहत्यांनीही सोशल मीडियावर भावना व्यक्त करत एका युगाचा अंत झाल्याचे म्हटले आहे.
क्रिकेट इतिहासातील सर्वात ‘कम्प्लीट क्रिकेटर’
सर गॅरी सोबर्स यांना क्रिकेट इतिहासातील सर्वात ‘Complete Cricketer’ म्हणून ओळखले जाते. फलंदाजी, गोलंदाजी आणि क्षेत्ररक्षण या तिन्ही विभागांमध्ये त्यांनी अशी छाप सोडली की, आजही प्रत्येक महान ऑलराउंडरची तुलना त्यांच्याशी केली जाते. वेस्ट इंडिजच्या सुवर्णकाळात त्यांनी संघाला अनेक संस्मरणीय विजय मिळवून दिले.
20 वर्षांच्या कसोटी कारकिर्दीत रचले अनेक विक्रम
1954 ते 1974 या कालावधीत त्यांनी वेस्ट इंडिजसाठी 93 कसोटी सामने खेळले. 160 डावांत 57.78 च्या सरासरीने 8,032 धावा करत त्यांनी 26 शतके, 30 अर्धशतके, दोन द्विशतके आणि एक त्रिशतक झळकावले. त्यांची नाबाद 365 धावांची खेळी अनेक वर्षे कसोटी क्रिकेटमधील सर्वोच्च वैयक्तिक धावसंख्या म्हणून कायम होती.
फलंदाजीइतकीच त्यांची गोलंदाजीही प्रभावी होती. डाव्या हाताच्या या अष्टपैलू खेळाडूने 235 कसोटी विकेट्स घेतल्या. वेगवान-मध्यमगतीपासून ऑर्थोडॉक्स आणि अनऑर्थोडॉक्स स्पिनपर्यंत विविध प्रकारची गोलंदाजी करण्याची त्यांची क्षमता त्यांना इतरांपेक्षा वेगळे ठरवत होती.
अनेक सर्वोच्च सन्मानांनी झाला गौरव
सर गॅरी सोबर्स यांनी वेस्ट इंडिजचे नेतृत्वही केले. क्रिकेटमधील अतुलनीय योगदानासाठी त्यांना ‘नाइटहुड’ बहाल करण्यात आले. तसेच ICC Hall of Fame आणि Wisden Cricketers of the Century यांसारख्या प्रतिष्ठेच्या सन्मानांनी त्यांचा गौरव करण्यात आला. विशेष म्हणजे, त्यांनी आपल्या संपूर्ण कारकिर्दीत केवळ एकच वनडे सामना खेळला होता.
क्रिकेटने गमावला खरा महानायक
सर गॅरी सोबर्स हे केवळ महान क्रिकेटपटू नव्हते, तर अनेक पिढ्यांसाठी प्रेरणास्थान होते. त्यांच्या खेळामुळे ऑलराउंडरची व्याख्याच बदलली. आजही जगातील कोणत्याही महान अष्टपैलू खेळाडूची तुलना करताना सर्वप्रथम सर गॅरी सोबर्स यांचे नाव घेतले जाते. त्यांच्या निधनामुळे क्रिकेटविश्वाची कधीही भरून न निघणारी हानी झाली असून, त्यांच्या आठवणी आणि विक्रम कायम चाहत्यांच्या मनात जिवंत राहतील.
News Title: Sir Garfield Sobers Passed Away West Indies Legend
