Shane Warne Death | जगप्रसिद्ध फिरकीपटू शेन वॉर्न (Shane Warne) यांच्या अचानक झालेल्या निधनाने काही वर्षांपूर्वी संपूर्ण क्रीडाजगत हादरले होते. कोणताही गंभीर आजार नसतानाही त्यांच्या मृत्यूची बातमी धक्कादायक ठरली होती. आता त्यांच्या निधनानंतर चार वर्षांनी त्यांच्या मुलाने केलेल्या विधानांमुळे या प्रकरणावर पुन्हा चर्चा सुरू झाली आहे.
मृत्यूचे कारण आणि मुलाचे वक्तव्य :
2022 साली थायलंड (Thailand) येथे शेन वॉर्न यांचे निधन झाले होते. त्या वेळी त्यांचे वय केवळ 52 वर्षे होते आणि हृदयविकाराच्या झटक्यामुळे त्यांचा मृत्यू झाल्याचे सांगण्यात आले होते. त्यांच्या फिटनेस आणि सक्रिय जीवनशैलीमुळे हा मृत्यू अनेकांसाठी अनपेक्षित होता. त्या घटनेने जगभरातील चाहत्यांना मोठा धक्का बसला होता.
दरम्यान, वॉर्न यांचा मुलगा जॅक्सन (Jackson Warne) याने अलीकडेच एका पॉडकास्टमध्ये आपल्या वडिलांच्या आरोग्याबाबत काही महत्त्वाच्या गोष्टी उघड केल्या आहेत. ‘टू वर्ल्ड्स कोलाईड पॉडकास्ट’ (Two Worlds Collide Podcast) या कार्यक्रमात बोलताना त्याने सांगितले की, त्यांच्या वडिलांना आधीपासून काही आरोग्याशी संबंधित समस्या होत्या, ज्याबद्दल बाहेर फारशी माहिती नव्हती.
Shane Warne Death | लसीकरणाबाबतचा दावा आणि नवी चर्चा :
जॅक्सनच्या मते, कोरोनाविरोधी लस घेतल्यानंतर त्यांच्या वडिलांच्या आरोग्याच्या अडचणी अधिक गंभीर झाल्या असाव्यात. या शक्यतेमुळेच त्यांच्या मृत्यूला कारणीभूत घटक वाढले असावेत, असे त्याने व्यक्त केले. याबाबत अधिक विचार केला तर राग येतो, त्यामुळे त्या दिशेने विचार टाळण्याचा प्रयत्न करतो, असेही त्याने सांगितले.
त्याने पुढे असेही नमूद केले की, शेन वॉर्न यांनी तीन ते चार वेळा कोरोना लस घेतली होती. प्रत्यक्षात त्यांना लसीकरणाची इच्छा नव्हती, पण व्यावसायिक कारणांमुळे त्यांना ती घ्यावी लागली, असा दावा जॅक्सनने केला आहे. या विधानांनंतर वॉर्न यांच्या मृत्यूबाबत नव्याने चर्चा रंगण्याची शक्यता निर्माण झाली आहे.
