Sandipan Bhumare | हैदराबादमधील सालार जंग कुटुंबातील वंशजाने शिवसेना खासदार संदीपान भुमरे (Sandipan Bhumare) यांच्या ड्रायव्हरच्या नावाने १५० कोटी रुपयांची जमीन ‘हिबानामा’ (भेटवस्तू) म्हणून दिली आहे, ज्यामुळे हे प्रकरण संशयाच्या भोवऱ्यात आले आहे. छत्रपती संभाजीनगरमधील जालना रोडवरील दाऊदपुरा येथे असलेल्या तीन एकर जमिनीची किंमत १५० कोटी इतकी आहे. या प्रकरणी खासदार संदीपान भुमरे, त्यांचे आमदार पुत्र विलास भुमरे आणि त्यांचा चालक जावेद रसूल शेख यांची आर्थिक गुन्हे शाखेकडून चौकशी सुरू करण्यात आली आहे.
ड्रायव्हरला १५० कोटींची जमीन भेट
आमदार विलास भुमरे यांनी यासंदर्भात प्रतिक्रिया देताना सांगितले की, जावेद रसूल माझे ड्रायव्हर आहेत, परंतु त्यांच्या व्यक्तिगत जीवनाशी माझा कुठलाही संबंध नाही. हे प्रकरण परभणीतील एका वकिलाने दाखल केलेल्या तक्रारीवरून समोर आले आहे आणि त्यावर सध्या तपास सुरू आहे. छत्रपती संभाजीनगर पोलिसांच्या आर्थिक गुन्हे शाखेने ड्रायव्हर जावेद रसूल शेख यांना चौकशीसाठी बोलावले आहे.
चौकशीदरम्यान, जावेद रसूल शेख यांना त्यांच्या आयकर रिटर्नच्या प्रती, उत्पन्नाचे स्थापित स्रोत आणि त्यांच्या नावावर हे गिफ्ट डीड कोणत्या आधारावर स्वाक्षरी करण्यात आले आहे, हे स्पष्ट करण्यास सांगितले आहे. सालार जंग कुटुंबातील वंशज मीर मजहर अली खान आणि त्यांच्या सहा नातेवाईकांनी स्वाक्षरी केलेल्या या हिबानामाची चौकशी सुरू आहे.
सालार जंग कुटुंब हे एक प्रमुख कुलीन कुटुंब होते, ज्यांचे सदस्य पूर्वीच्या हैदराबाद इस्टेटमध्ये निजामांचे पंतप्रधान होते. त्यांच्याकडून एवढ्या मोठ्या किमतीची जमीन एका ड्रायव्हरला भेट म्हणून दिल्यामुळे अनेक प्रश्न निर्माण झाले आहेत. हिबानामा हा एक कायदेशीर दस्तऐवज आहे, ज्याद्वारे एखादी व्यक्ती आपली मालमत्ता दुसऱ्या व्यक्तीला निस्वार्थपणे, म्हणजे कोणतीही आर्थिक देवाण-घेवाण न करता, भेट स्वरूपात देतो. ‘हिबा’ हा अरबी शब्द असून, त्याचा अर्थ ‘भेट देणे’ असा होतो. विशेषतः मुस्लीम कायद्यात हिबा ही संकल्पना महत्त्वाची आहे, परंतु काही वेळा ती सर्वसामान्य कायदेशीर व्यवहारातही वापरली जाते. या प्रकरणात हिबानामा करण्यामागे नेमके कोणते नियम वापरले गेले आणि यामागे काही आर्थिक व्यवहार आहे का, याचा तपास पोलीस करत आहेत.
आर्थिक गुन्हे शाखेकडून चौकशी
या प्रकरणात खासदार संदीपान भुमरे (Sandipan Bhumare) आणि आमदार विलास भुमरे यांच्यावर संशयाची सुई निर्माण झाली आहे, कारण त्यांच्या चालकाला इतक्या मोठ्या किमतीची जमीन भेट मिळाल्याने यामागे काही आर्थिक गैरव्यवहार असल्याचा संशय व्यक्त केला जात आहे. आर्थिक गुन्हे शाखेकडून होणाऱ्या या चौकशीतून सत्य समोर येण्याची अपेक्षा आहे.
