Salman Khan | नीट (NEET) परीक्षा पेपरफुटी प्रकरणावर अभिनेता सलमान खान (Salman Khan) यांनी विद्यार्थ्यांना पाठिंबा दिल्यानंतर आता त्यांचा एक जुना व्हिडिओ सोशल मीडियावर मोठ्या प्रमाणात व्हायरल होत आहे. या व्हिडिओमध्ये त्यांचे वडील सलीम खान (Salim Khan) यांनी सलमानच्या शालेय जीवनातील एक किस्सा सांगितल्याचा दावा केला जात असून, त्यानंतर सोशल मीडियावर विविध प्रतिक्रिया उमटताना दिसत आहेत.
जुना व्हिडिओ पुन्हा चर्चेत :
देशभरात नीट परीक्षा पेपरफुटीच्या मुद्द्यावर विद्यार्थ्यांचे आंदोलन सुरू असताना अनेक कलाकारांनीही या विषयावर भूमिका मांडली आहे. सलमान खान यांनीही सोशल मीडियावर पेपरफुटी हा अत्यंत गंभीर विषय असल्याचे नमूद करत विद्यार्थ्यांना पाठिंबा दर्शवला. त्यांच्या या भूमिकेनंतर लगेचच कपिल शर्मा (Kapil Sharma) यांच्या कार्यक्रमातील एक जुना व्हिडिओ सोशल मीडियावर पुन्हा व्हायरल झाला.
या व्हिडिओमध्ये सलमान खान यांच्यासोबत सलीम खान, सोहेल खान (Sohail Khan) आणि अरबाज खान (Arbaaz Khan) उपस्थित असल्याचे दिसते. व्हिडिओमध्ये सलीम खान हे सलमानच्या शालेय जीवनातील एका प्रसंगाचा उल्लेख करताना दिसत आहेत. हा व्हिडिओ समोर आल्यानंतर काही सोशल मीडिया वापरकर्त्यांनी सलमान खान यांच्या अलीकडील वक्तव्यावर प्रश्न उपस्थित केले असून विविध प्रकारच्या प्रतिक्रिया व्यक्त केल्या आहेत.
Salman Khan | सलीम खान यांनी सांगितलेला किस्सा :
व्हायरल होत असलेल्या व्हिडिओमध्ये सलीम खान सांगतात की, ते त्या काळात कामात अत्यंत व्यस्त असायचे. त्यांच्या घरी गणेश नावाची एक व्यक्ती वारंवार येत असे आणि कुटुंबातील सर्वजण त्याला विशेष मान देत असत. त्याला मिळणारा सन्मान पाहून आपण तो नेमका कोण आहे, याची माहिती घेण्याचा प्रयत्न केला, असे त्यांनी कार्यक्रमात सांगितले.
Salman Khan today: “Paper leak is a very serious issue”
Salim Khan on Kapil’s show: “Ganesh naam ke ladke ki sabse zyada izzat thi hamare ghar mein, kyoki PAPER LEAK hote the to woh Salman ko laake deta tha” 😭😭😭 https://t.co/yeXlInPJce pic.twitter.com/GubGJQid5j
— Raj (@idfcwau) July 22, 2026
सलीम खान यांनी पुढे सांगितल्याप्रमाणे, चौकशी केल्यानंतर त्यांना समजले की हीच व्यक्ती त्यांच्या मुलांना परीक्षेच्या फुटलेल्या प्रश्नपत्रिका मिळवून देत असे. कार्यक्रमातील संभाषणादरम्यान सलमान खान यांनीही त्या फुटलेल्या प्रश्नपत्रिकांच्या मदतीने काही परीक्षा उत्तीर्ण झाल्याचा उल्लेख केल्याचे व्हिडिओमध्ये दिसत असल्याचा दावा केला जात आहे.
