Raksha Bandhan 2026 | यंदाचे रक्षाबंधन आणि चंद्रग्रहण एकाच दिवशी येत असल्याने अनेकांच्या मनात संभ्रम निर्माण झाला आहे. 28 ऑगस्ट रोजी खंडग्रास चंद्रग्रहण होणार असले तरी भारतात त्याचा धार्मिक परिणाम होणार का, राखी बांधण्यासाठी शुभ वेळ कोणती असेल आणि सुतक लागू होईल का, याबाबत अनेकांना उत्सुकता आहे.
चंद्रग्रहणाची वेळ काय असणार? :
28 ऑगस्ट रोजी सकाळी 6.32 वाजता चंद्रग्रहण सुरू होईल आणि दुपारी 12.32 वाजेपर्यंत, म्हणजेच एकूण 5 तास 39 मिनिटे चालेल. या ग्रहणादरम्यान चंद्राचा सुमारे 96 टक्के भाग पृथ्वीच्या गडद सावलीत जाईल. त्यामुळे चंद्र तांबूस किंवा ताम्र रंगाचा दिसणार असून या खगोलीय घटनेला ब्लड मून (Blood Moon) असे संबोधले जाते.
हे ग्रहण युरोप (Europe), आफ्रिका (Africa), अमेरिका (America) तसेच पश्चिम आशियातील काही भागांत स्पष्टपणे दिसणार आहे. मात्र, ग्रहणाची वेळ भारतात दिवसाची असल्यामुळे हा खगोलीय नजारा येथे दिसणार नाही. त्यामुळे भारतात या ग्रहणाचा सुतक किंवा धार्मिक बंधनांशी संबंध जोडला जाणार नसल्याचे सांगितले जात आहे.
Raksha Bandhan 2026 | राखी बांधण्यासाठी शुभ वेळ कोणती? :
भारतात चंद्रग्रहण दृश्यमान नसल्यामुळे त्याचा रक्षाबंधनाच्या विधींवर कोणताही परिणाम होणार नाही. त्यामुळे बहिणींना 28 ऑगस्ट रोजी कोणत्याही अडथळ्याशिवाय भावाच्या मनगटावर राखी बांधता येणार आहे. पौर्णिमा (Purnima) तिथी 27 ऑगस्ट रोजी सकाळी 8.31 वाजता सुरू होऊन 28 ऑगस्ट रोजी सकाळी 9.18 वाजेपर्यंत राहणार आहे. उदयतिथीनुसार 28 ऑगस्टलाच रक्षाबंधन साजरे केले जाईल. तसेच या दिवशी भद्रा (Bhadra) दोष नसल्याने संपूर्ण दिवसभर राखी बांधणे शुभ मानले जात आहे.
धार्मिक मान्यतेनुसार, ज्या ठिकाणी चंद्रग्रहण दिसते तेथे ग्रहणकाळात मंदिरांचे दरवाजे बंद ठेवणे, देवमूर्तींना स्पर्श न करणे, पूजा थांबवणे तसेच अन्न शिजवणे किंवा ग्रहण न करणे अशा परंपरा पाळल्या जातात. शिजवलेल्या अन्नावर तुळशीची पाने ठेवण्याचीही प्रथा आहे. मात्र, भारतात हे ग्रहण दिसणार नसल्याने अशा धार्मिक बंधनांचे पालन करण्याची आवश्यकता नसल्याचे मानले जाते. तरीही काही जण श्रद्धेनुसार स्नान, दान आणि इतर पुण्यकर्म करण्यास प्राधान्य देतात.
