Raj Thackeray | नीट पेपरफुटी प्रकरणावरून महाराष्ट्र नवनिर्माण सेना अध्यक्ष राज ठाकरे (Raj Thackeray) यांनी केंद्र सरकार आणि शिक्षण व्यवस्थेवर जोरदार टीका केली. नाशिक दौऱ्यात पत्रकारांशी बोलताना त्यांनी विद्यार्थ्यांच्या प्रश्नांकडे दुर्लक्ष होत असल्याचा आरोप केला. यावेळी त्यांनी केंद्रीय शिक्षणमंत्री धर्मेंद्र प्रधान (Dharmendra Pradhan) यांच्या मुलीच्या शिक्षणाचा मुद्दाही उपस्थित करत सरकारला विचार करायला लावणारे प्रश्न उपस्थित केले.
नीट प्रकरणावर सरकारवर हल्लाबोल :
पत्रकारांशी संवाद साधताना राज ठाकरे म्हणाले की, देशातील विद्यार्थी हे राष्ट्राचे भविष्य आहेत, मात्र त्यांच्या अडचणींकडे गांभीर्याने पाहिले जात नाही. दरवर्षी शिक्षणाशी संबंधित प्रश्नांवर आंदोलने होत असताना त्यावर ठोस उपाययोजना होत नसल्याची टीका त्यांनी केली. विद्यार्थ्यांनी संताप व्यक्त करू नये, शिवीगाळ करू नये असे सांगितले जाते, परंतु अशा भाषेचा वापर करण्याचा अधिकार फक्त भारतीय जनता पक्षाला आहे का, असा सवाल त्यांनी उपस्थित केला. “ही तर केवळ नीट प्रकरणाची सुरुवात आहे, पुढे आणखी काय घडते ते पाहा,” असा इशाराही त्यांनी दिला.
यापुढे बोलताना त्यांनी शिक्षण क्षेत्रातील व्यापारीकरणावरही निशाणा साधला. महाविद्यालयांची भूमिका काय आहे आणि व्यावसायिक क्लासेसवर नियंत्रण आणले जाणार की नाही, याची जबाबदारी सरकारने घ्यावी, असे ते म्हणाले. वर्तमानपत्रांमध्ये टॉपर विद्यार्थ्यांच्या मोठमोठ्या जाहिराती दिल्या जातात, पण त्यामागील प्रक्रियेची चौकशी होत नाही, असा आरोपही त्यांनी केला. पेपरफुटीसारख्या घटनांमागे नेमके कोण आहे, सरकारमधील कोणी संबंधित आहे का, याची स्पष्ट उत्तरे सरकारने जनतेसमोर मांडावीत, अशी मागणी त्यांनी केली.
Raj Thackeray | धर्मेंद्र प्रधानांच्या मुलीवरून उपस्थित केला प्रश्न :
राज ठाकरे यांनी शिक्षण व्यवस्थेवरील विश्वासाचा मुद्दा उपस्थित करत केंद्रीय शिक्षणमंत्री धर्मेंद्र प्रधान यांच्यावरही टीका केली. त्यांनी सांगितले की, देशातील लाखो पालक आपल्या मुलांना उच्च शिक्षणासाठी परदेशात पाठवत आहेत. सरकारमधील अनेक मंत्र्यांची मुलेही परदेशात शिक्षण घेत असल्याचे त्यांनी नमूद केले. अशा परिस्थितीत धर्मेंद्र प्रधान यांच्या मुलीनेही परदेशात शिक्षण घेतले असेल आणि देशातील शिक्षण व्यवस्थेवरच विश्वास नसेल, तर सामान्य नागरिकांच्या मुलांनी नेमका कोणावर विश्वास ठेवायचा, असा प्रश्न त्यांनी उपस्थित केला.
यावेळी मोहन भागवत (Mohan Bhagwat) यांनी Gen Z तरुणांशी साधलेल्या संवादाचाही उल्लेख करण्यात आला. त्यावर प्रतिक्रिया देताना राज ठाकरे म्हणाले की, हा संवाद खूप उशिरा सुरू झाला. विद्यार्थ्यांच्या समस्या, त्यांच्या पालकांना भेडसावणाऱ्या अडचणी आणि बदलत्या जगाकडे पाहण्याचा तरुणांचा दृष्टिकोन सरकारने समजून घेण्याची गरज आहे. तज्ज्ञांशी चर्चा करून शिक्षण व्यवस्थेतील त्रुटींवर कायमस्वरूपी उपाय शोधले तरच परिस्थितीत सुधारणा होईल, असेही त्यांनी स्पष्ट केले.
