OnePlus 15R Launch | स्मार्टफोन बाजारात वनप्लस (OnePlus) ने आपल्या लोकप्रिय OnePlus 15R सीरिजमध्ये आणखी एक दमदार पर्याय सादर केला आहे. अधिक वेगवान कामगिरी आणि जास्त स्टोरेजची गरज असलेल्या ग्राहकांसाठी कंपनीने 16GB रॅम आणि 512GB अंतर्गत स्टोरेजसह नवीन व्हेरिएंट बाजारात आणला आहे. या नव्या मॉडेलच्या किंमतीसह त्याची वैशिष्ट्ये सध्या ग्राहकांचे लक्ष वेधून घेत आहेत.
नवीन व्हेरिएंटची किंमत आणि उपलब्धता :
OnePlus 15R हा स्मार्टफोन 2025 मध्ये दोन वेगवेगळ्या रॅम आणि स्टोरेज पर्यायांसह सादर करण्यात आला होता. त्यावेळी सर्वाधिक क्षमतेच्या मॉडेलमध्ये 12GB रॅम आणि 512GB स्टोरेज देण्यात आले होते. आता कंपनीने त्याच फोनचा 16GB रॅम आणि 512GB स्टोरेज असलेला नवा पर्याय उपलब्ध करून दिला आहे. विशेष म्हणजे, या नवीन व्हेरिएंटमध्ये रॅम वाढवण्याव्यतिरिक्त इतर कोणत्याही फीचर्समध्ये बदल करण्यात आलेला नाही.
नवीन 16GB रॅम आणि 512GB स्टोरेज व्हेरिएंटची किंमत 61,999 रुपये ठेवण्यात आली आहे. तर 12GB रॅम आणि 256GB स्टोरेज असलेल्या बेस मॉडेलची किंमत 54,999 रुपये असून, 12GB रॅम आणि 512GB स्टोरेज व्हेरिएंट 59,999 रुपयांना उपलब्ध आहे. ग्राहकांना एचडीएफसी (HDFC), कोटक (Kotak) आणि आयडीएफसी (IDFC) बँकांच्या निवडक कार्डांवर 3,000 रुपयांपर्यंत सवलतीचाही लाभ मिळणार आहे.
OnePlus 15R Launch | फीचर्स आणि बाजारातील स्पर्धा :
वनप्लसच्या अधिकृत वेबसाइटसह ॲमेझॉन (Amazon) वर हा स्मार्टफोन मिंट ब्रीज, चारकोल ब्लॅक आणि इलेक्ट्रिक व्हायोलेट या रंग पर्यायांमध्ये विक्रीसाठी उपलब्ध असेल. या किंमत श्रेणीत हा स्मार्टफोन शाओमी 14 सिव्ही (Xiaomi 14 CIVI), ओप्पो रेनो13 प्रो 5जी (OPPO Reno13 Pro 5G) आणि सॅमसंग गॅलेक्सी एस25 एफई 5जी (Samsung Galaxy S25 FE 5G) यांना थेट स्पर्धा देणार आहे.
फीचर्सबाबत बोलायचे झाल्यास, OnePlus 15R मध्ये 165Hz रिफ्रेश रेटसह 6.8 इंचाचा 1.5K AMOLED डिस्प्ले देण्यात आला आहे, जो 1800 निट्सपर्यंत ब्राइटनेस प्रदान करतो. फोनमध्ये स्नॅपड्रॅगन 8 जेन 5 (Snapdragon 8 Gen 5) प्रोसेसर वापरण्यात आला आहे. फोटोग्राफीसाठी 50 मेगापिक्सलचा ड्युअल रिअर कॅमेरा आणि 32 मेगापिक्सलचा फ्रंट कॅमेरा मिळतो. हा फोन 4K रिझोल्यूशनमध्ये 120fps व्हिडिओ रेकॉर्डिंगला सपोर्ट करतो. याशिवाय क्लिअर बर्स्ट, अल्ट्रा क्लिअर मोड आणि क्लिअर नाईट इंजिन यांसारखी प्रगत वैशिष्ट्येही देण्यात आली आहेत. पॉवर बॅकअपसाठी 7400mAh बॅटरी आणि 80W सुपरव्हूक (SuperVOOC) फास्ट चार्जिंग सपोर्ट उपलब्ध आहे.
