Omraje Nimbalkar | धाराशिवच्या राजकारणात मोठी उलथापालथ घडण्याची चिन्हे दिसत आहेत. धाराशिवचे खासदार ओमराजे निंबाळकर हे लवकरच शिवसेनामध्ये प्रवेश करणार असल्याच्या चर्चांना जोर आला आहे. रविवारी गोवर्धनवाडी येथे आयोजित कार्यकर्त्यांच्या बैठकीनंतर या चर्चांना अधिक बळ मिळाले. बैठकीत ओमराजे निंबाळकर यांनी सत्तेतील नेतृत्वासोबत राहण्याची गरज व्यक्त करत कार्यकर्त्यांना आपल्या आगामी निर्णयाच्या पाठीशी उभे राहण्याचे आवाहन केल्याचे समोर आले आहे.
गेल्या काही दिवसांपासून ठाकरे गटातील काही खासदारांच्या नाराजीमुळे राज्यातील राजकीय घडामोडींना वेग आला आहे. या पार्श्वभूमीवर ओमराजे निंबाळकर यांच्या भूमिकेकडे सर्वांचे लक्ष लागले होते. कार्यकर्त्यांसोबतच्या बैठकीत त्यांनी विकासकामांसाठी निधी आणि सत्तेची साथ आवश्यक असल्याचे स्पष्ट संकेत दिल्याने त्यांच्या पुढील राजकीय वाटचालीबाबत चर्चा रंगल्या आहेत.
विकासकामांसाठी सत्तेची साथ आवश्यक, ओमराजेंचे संकेत :
बैठकीत बोलताना ओमराजे निंबाळकर यांनी मतदारसंघातील विकासकामांसाठी सत्तेचा आधार महत्त्वाचा असल्याचे सांगितले. “लोकांची कामे करण्यासाठी निधी आवश्यक आहे. कार्यकर्त्यांच्या अडचणी सोडवण्यासाठी सत्तेतील नेतृत्व स्वीकारावे लागेल,” असे त्यांनी म्हटल्याची माहिती समोर आली आहे. तसेच स्थानिक स्वराज्य संस्थांच्या निवडणुकांमध्ये अपेक्षित यश मिळाले नसल्याचाही त्यांनी उल्लेख केला.
यावेळी त्यांनी महाराष्ट्राचे उपमुख्यमंत्री एकनाथ शिंदे यांचे कौतुक केल्याचेही सांगितले जात आहे. निकालानंतर शिंदे यांनी स्वतः दखल घेतल्याचा दावा करत त्यांनी कार्यकर्त्यांना भावनिक आवाहन केले. त्यांच्या आवाजातील कथित ऑडिओ क्लिप सोशल मीडियावर व्हायरल होत असली तरी तिची अधिकृत पुष्टी झालेली नाही.
Omraje Nimbalkar | उद्धव ठाकरेंसमोर नवे आव्हान, पुढील निर्णयाकडे लक्ष :
ओमराजे निंबाळकर यांच्या संभाव्य निर्णयामुळे उद्धव ठाकरे यांच्यासमोर नवे राजकीय आव्हान उभे राहण्याची शक्यता आहे. गेल्या काही दिवसांपासून ठाकरे गटातील नाराज खासदारांना थांबवण्यासाठी प्रयत्न सुरू असल्याची चर्चा आहे. मात्र, ओमराजे यांनी सत्तेसोबत जाण्याचे संकेत दिल्याने आगामी राजकीय समीकरणांवर त्याचा मोठा परिणाम होऊ शकतो.
दरम्यान, बैठकीत त्यांनी केंद्रीय गृहमंत्री अमित शाह यांच्याशी चर्चा झाल्याचा उल्लेख केल्याचेही सांगितले जात आहे. “मी जो निर्णय घेणार आहे, त्यामागे तुम्ही ठामपणे उभे राहा,” असे आवाहन त्यांनी कार्यकर्त्यांना केले. आता ओमराजे निंबाळकर अधिकृतपणे कोणती भूमिका जाहीर करतात आणि ते शिंदे गटात प्रवेश करतात का, याकडे राज्याच्या राजकारणाचे लक्ष लागले आहे.
