Nashik Election 2026 | नाशिक महापालिका निवडणुकीच्या मतदानाच्या दिवशी शहरातील सावतानगर परिसरात मोठा गोंधळ उडाल्याची घटना समोर आली आहे. माजी आमदार सुधाकर बडगुजर (Sudhakar Badgujar) यांच्या कार्यालयाबाहेर मतदारांना पैसे वाटले जात असल्याचा आरोप करण्यात आल्यानंतर परिसरात नागरिकांची मोठी गर्दी जमली. अचानक पसरलेल्या या अफवेमुळे निवडणूक वातावरण तापले असून काही काळ तणावाची स्थिती निर्माण झाली होती.
मतदानाच्या दिवशीच घडलेल्या या प्रकारामुळे राजकीय वर्तुळातही खळबळ उडाली आहे. कोणताही ठोस पुरावा समोर आलेला नसतानाही पैसे वाटप होत असल्याच्या चर्चेमुळे सावतानगर परिसरात गोंधळाचे वातावरण तयार झाले. परिस्थिती चिघळण्याची शक्यता लक्षात घेता पोलिसांनी तत्काळ घटनास्थळी धाव घेत हस्तक्षेप केला.
अपक्ष उमेदवार मुकेश शहाणेंचा थेट आरोप, पोलिसांचा सौम्य लाठीचार्ज :
या प्रकरणात प्रभाग क्रमांक २९ मधील अपक्ष उमेदवार मुकेश शहाणे (Mukesh shahane) यांनी थेट सुधाकर बडगुजर यांच्या कार्यालयाबाहेर जाऊन आक्रमक भूमिका घेतली. कार्यालयाबाहेर पैसे वाटले जात असल्याचा आरोप करत त्यांनी जोरदार गोंधळ घातला. त्यांच्या या कृतीमुळे परिसरात जमाव वाढत गेला आणि परिस्थिती नियंत्रणाबाहेर जाण्याची शक्यता निर्माण झाली.
तणाव वाढत असल्याचे लक्षात येताच पोलिसांनी जमाव पांगवण्यासाठी सौम्य लाठीचार्जचा वापर केला. यानंतर काही काळ परिसरात तणावपूर्ण शांतता होती. कोणताही अनुचित प्रकार घडू नये यासाठी पोलिस बंदोबस्त वाढवण्यात आला असून परिस्थितीवर बारकाईने नजर ठेवली जात आहे.
Nashik Election 2026 | दीपक बडगुजर रिंगणात, मनसेच्या पाठिंब्यामुळे लढतीला रंगत :
दरम्यान, नाशिकच्या प्रभाग क्रमांक २९ मधून माजी आमदार सुधाकर बडगुजर यांचे पुत्र दीपक बडगुजर हे निवडणूक लढवत आहेत. त्यामुळे सावतानगर परिसरातील ही घटना राजकीयदृष्ट्या अत्यंत संवेदनशील मानली जात आहे. पैसे वाटपाच्या आरोपांमुळे या प्रभागातील निवडणूक अधिक चर्चेत आली आहे. (Nashik Election 2026)
दुसरीकडे, या निवडणुकीत राजकीय समीकरणांमध्येही मोठा बदल पाहायला मिळत आहे. महाराष्ट्र नवनिर्माण सेनेने अपक्ष उमेदवार मुकेश शहाणे यांना अधिकृत पाठिंबा जाहीर केला आहे. विशेष म्हणजे, शहाणे हे पूर्वी भाजपचे उमेदवार होते. तिकीट न मिळाल्यानंतर त्यांनी बंडखोरी करत अपक्ष म्हणून निवडणूक लढवण्याचा निर्णय घेतला होता. मनसेचा पाठिंबा मिळाल्याने ही लढत अधिकच रंगतदार बनली आहे.
