Mumbai Water Supply | मुंबईतील नागरिकांसाठी महत्त्वाची सूचना समोर आली आहे. उष्णतेचा प्रभाव वाढत असतानाच काही भागांमध्ये पाणीपुरवठा तात्पुरता बंद राहणार आहे. महापालिकेकडून जलवाहिनी दुरुस्तीचे काम हाती घेण्यात येणार असल्यामुळे काही परिसरांना 24 तास पाण्याविना राहावे लागू शकते. त्यामुळे नागरिकांनी आधीच पाण्याचा साठा करून ठेवण्याचे आवाहन करण्यात आले आहे. (BMC water work)
जलवाहिनी दुरुस्तीमुळे पुरवठा खंडित :
गोरेगाव (पूर्व) परिसरातील दादासाहेब फाळके चित्रनगरी मार्गावर उड्डाणपुलाच्या पोहोच रस्त्याजवळ 750 मिलीमीटर व्यासाच्या मुख्य जलवाहिनीची जोडणी करण्याचे काम नियोजित करण्यात आले आहे. हे काम मुंबई महानगरपालिका (Brihanmumbai Municipal Corporation) यांच्या माध्यमातून हाती घेण्यात आले असून 10 मार्च रोजी सकाळी 9 वाजल्यापासून ते 11 मार्च रोजी सकाळी 9 वाजेपर्यंत दुरुस्तीचे काम सुरू राहणार आहे. या कालावधीत काही भागांमध्ये पाणीपुरवठा पूर्णपणे बंद राहणार आहे. (Mumbai Water Supply)
या कामामुळे ‘पी पूर्व’ आणि ‘पी दक्षिण’ विभागातील अनेक परिसरांना पाण्याची अडचण भासण्याची शक्यता आहे. गोरेगाव परिसरात साधारण 24 तास पाणीपुरवठा बंद राहील. दुरुस्ती पूर्ण झाल्यानंतरही काही काळ कमी दाबाने पाणीपुरवठा होण्याची शक्यता असल्याचे महापालिकेकडून सांगण्यात आले आहे. त्यामुळे नागरिकांनी पाण्याचा वापर काळजीपूर्वक करावा आणि अनावश्यक अपव्यय टाळावा, असे आवाहन करण्यात आले आहे.
Mumbai Water Supply | या परिसरांमध्ये पूर्ण पाणीपुरवठा बंद :
या कालावधीत ‘पी पूर्व’ आणि ‘पी दक्षिण’ विभागातील अनेक भागांमध्ये पाणीपुरवठा पूर्णपणे बंद राहणार आहे. शिवशाही प्रकल्प, श्रीकृष्ण नगर, इंदिरा गांधी संशोधन संस्था (Indira Gandhi Research Institute) परिसर, सॅटेलाईट टॉवर, माळी नगर, संतोष नगर, हबळे पाडा, नगरमोडे पाडा, उमरशेट पाडा, सुनील मैदान तसेच फिल्म सिटी मार्गालगतचा परिसर या भागांमध्ये पाणीपुरवठा थांबणार आहे.
याशिवाय काही भागांमध्ये पाण्याचा दाब कमी राहण्याची शक्यता आहे. मोहन गोखले मार्ग, कृष्णा वाटिका मार्ग, साई मार्ग आणि आर्य भास्कर मार्ग या परिसरांमध्ये मंगळवारी पाणी कमी दाबाने येण्याची शक्यता वर्तवण्यात आली आहे. त्यामुळे नागरिकांनी आवश्यक तेवढा पाण्याचा साठा करून ठेवावा आणि नियोजनबद्ध वापर करावा, असे आवाहन प्रशासनाकडून करण्यात आले आहे.
