MSRTC | महाराष्ट्र राज्य मार्ग परिवहन महामंडळाच्या (MSRTC) ‘आवडेल तेथे प्रवास’ या योजनेच्या दरात वाढ करण्यात आली आहे. या योजनेअंतर्गत मिळणाऱ्या चार आणि सात दिवसांच्या पाससाठी प्रवाशांना आता जास्त पैसे मोजावे लागणार आहेत. विशेष म्हणजे, या दरवाढीमध्ये प्रथमच एसटीच्या (MSRTC) ई-शिवाईचा (E-Shivai) समावेश करण्यात आला आहे.
एसटी महामंडळाच्या या प्रस्तावाला सक्षम प्राधिकरणाने मंजुरी दिली असून, नवीन दर आज, शुक्रवार, ३१ जानेवारीच्या मध्यरात्रीपासून लागू होणार आहेत. या दरवाढीमुळे साध्या बसमधून (Ordinary Bus) प्रवास करणाऱ्यांना चार दिवसांच्या पाससाठी ६४४ रुपये आणि सात दिवसांच्या पाससाठी ११३१ रुपये अधिक मोजावे लागणार आहेत.
चार आणि सात दिवसांच्या पासचे दर वाढले
‘आवडेल तेथे प्रवास’ या योजनेअंतर्गत प्रवाशांना राज्यातील कोणत्याही मार्गावर, कोणत्याही बसमधून (Bus) प्रवास करता येतो. या योजनेत १२ वर्षांखालील मुलांना मोफत प्रवासाची सुविधा आहे. या योजनेत चार दिवस आणि सात दिवसांच्या पासची सुविधा देण्यात येते.
आता या योजनेच्या दरात वाढ करण्यात आली आहे. साध्या बससाठी (Ordinary Bus) चार दिवसांच्या पाससाठी प्रौढांना १,८१४ रुपये तर मुलांना ९१० रुपये मोजावे लागतील. सात दिवसांच्या पाससाठी प्रौढांना ३,१७१ रुपये तर मुलांना १,५८८ रुपये मोजावे लागतील.
ई-बससाठी सर्वाधिक दर
या दरवाढीत प्रथमच ई-शिवाईचा (E-Shivai) समावेश करण्यात आला आहे. ई-बसच्या (E-Bus) पाससाठी प्रवाशांना सर्वाधिक म्हणजे २,८६१ रुपये मोजावे लागणार आहेत.
ही दरवाढ आज, ३१ जानेवारीच्या मध्यरात्रीपासून लागू होणार आहे. एसटीच्या (MSRTC) अधिकाऱ्यांनी दिलेल्या माहितीनुसार, राज्यात एसटीच्या तिकीट दरात १४.९५ टक्के वाढ लागू झाली आहे. या वाढीव दरानुसार ‘आवडेल तेथे प्रवास’ योजनेतील पास दरवाढीचा प्रस्ताव तयार करण्यात आला होता. या प्रस्तावाला सक्षम प्राधिकरणाने मंजुरी दिली आहे.
एसटी महामंडळालाआशा आहे की, ‘आवडेल तेथे प्रवास’ या योजनेमुळे एसटीच्या (MSRTC) उत्पन्नातही वाढ होईल. भाववाढीमुळे एसटीला तीर्थस्थळे , पर्यटनस्थळी जाणाऱ्या प्रवाशांकडून जादा पैसे मिळतील.
Title: MSRTC Aavdel Tithe Pravas Scheme Becomes Expensive
