Maharashtra Weather Alert | महाराष्ट्रात हवामानाचा पारा पुन्हा एकदा चढू लागला असून उष्णतेसोबतच अवकाळी पावसाचाही धोका कायम आहे. राज्यात सध्या दुहेरी हवामान संकट निर्माण झाल्याचे चित्र दिसत आहे. 10 एप्रिल रोजी बहुतांश भागात कोरडे आणि उष्ण हवामान राहणार असले तरी काही ठिकाणी हलक्या सरींची शक्यता वर्तवण्यात आली आहे.
कोकण किनारपट्टीवर अलर्ट, मुंबई-ठाण्यात उष्णतेचा तडाखा :
कोकण किनारपट्टीवरील मुंबई (Mumbai), ठाणे, रायगड आणि रत्नागिरी भागात उष्ण व दमट हवामान जाणवत आहे. हवामान विभागाने या परिसरासाठी यलो अलर्ट जारी केला असून पुढील 24 ते 48 तास महत्त्वाचे मानले जात आहेत. या भागातील तापमान 34 ते 38 अंश सेल्सिअसदरम्यान राहण्याचा अंदाज आहे. त्यामुळे नागरिकांनी दुपारच्या वेळेत बाहेर पडताना विशेष काळजी घेण्याचे आवाहन करण्यात आले आहे. (Maharashtra Weather Alert)
पश्चिम महाराष्ट्रातील पुणे, कोल्हापूर, सातारा, सांगली आणि सोलापूर येथे हवामान मुख्यतः कोरडे आणि उष्ण राहणार आहे. काही ठिकाणी हलक्या सरींची शक्यता असली तरी उष्णतेचा प्रभाव कायम राहणार आहे. पुण्यात कमाल तापमान 36 अंश सेल्सिअसपर्यंत पोहोचण्याचा अंदाज आहे.
Maharashtra Weather Alert | उत्तर महाराष्ट्रात कोरडे हवामान, उष्णतेची लाट कायम :
उत्तर महाराष्ट्रातील नाशिक, जळगाव, धुळे आणि नंदुरबार येथे हवामान पूर्णपणे कोरडे राहणार आहे. या भागात तापमान सातत्याने वाढत असून उन्हाचा कडाका अधिक तीव्र होत आहे. पुढील काही दिवस हीच स्थिती कायम राहण्याची शक्यता आहे.
मराठवाड्यातील छत्रपती संभाजीनगर, लातूर (Latur) आणि धाराशिव (Dharashiv) भागात तापमान 40 अंशांच्या पुढे जाण्याची शक्यता आहे. तर विदर्भातील नागपूर, अमरावती, अकोला, यवतमाळ आणि वर्धा येथे तापमान 39 ते 43 अंश सेल्सिअसदरम्यान राहण्याचा अंदाज आहे. उष्माघाताचा धोका वाढत असल्याने नागरिकांनी काळजी घेणे अत्यावश्यक आहे.
एकूण चित्र: राज्यात दुहेरी हवामान संकट :
राज्यभर हवामानात मोठे बदल दिसत असून काही भागात उष्णतेचा कहर तर काही ठिकाणी हलक्या पावसाची शक्यता अशी संमिश्र स्थिती निर्माण झाली आहे.
विशेषतः मुंबई आणि किनारपट्टी भागासाठी पुढील 48 तास महत्त्वाचे आहेत. तर मराठवाडा आणि विदर्भातील नागरिकांनी उष्णतेपासून बचावासाठी योग्य ती खबरदारी घेणे गरजेचे आहे. शेतकऱ्यांनीही पिकांचे संरक्षण करण्यासाठी बदलत्या हवामानाचा विचार करून नियोजन करण्याचे आवाहन करण्यात आले आहे.
