Lpg Booking New Update | एलपीजी ग्राहकांसाठी एक महत्त्वाची बातमी समोर आली आहे. देशातील आघाडीची तेल कंपनी भारत पेट्रोलियम कॉर्पोरेशन लिमिटेड (BPCL) ने गॅस सिलिंडर बुकिंगसाठी नवीन प्रक्रिया लागू केली आहे. विशेषतः ज्या ग्राहकांनी वर्षातील 12 सिलिंडरचा कोटा पूर्ण केला आहे, त्यांना आता अतिरिक्त सिलिंडर बुक करण्यासाठी काही प्रश्नांची उत्तरे द्यावी लागणार आहेत. ही नवी प्रक्रिया काय आहे जाणून घेऊया.
ग्राहकांनी वर्षभरातील आपले बारा सिलिंडर वापरून संपवले आहेत, त्यांना आता पुढील गॅस नोंदणी करण्यासाठी ‘हॅलो बीपीसीएल’ (Hello BPCL) या मोबाईल ॲप्लिकेशनवर जाऊन काही विशिष्ट प्रश्नांची उत्तरे देणे सक्तीचे करण्यात आले आहे.
नव्या नियमामुळे उडाला गोंधळ आणि एजन्सींची अडचण
रविवारी अचानक लागू करण्यात आलेल्या या नव्या प्रणालीबाबत गॅस वितरक आणि सामान्य नागरिक अशा दोन्ही घटकांना कोणतीही पूर्वकल्पना देण्यात आली नव्हती. सकाळपासून नेहमीच्या पद्धतीने मोबाईलवरून गॅस बुक करण्याचे ग्राहकांचे प्रयत्न वारंवार अपयशी ठरल्याने अनेकांनी थेट गॅस एजन्सीजकडे धाव घेतली. मात्र, तेथील कर्मचाऱ्यांनाही या नव्या बदलाची माहिती नसल्याने मोठा गोंधळ उडाला. अखेर एजन्सी चालकांनी कंपनीच्या वरिष्ठ अधिकाऱ्यांशी थेट संपर्क साधल्यानंतर या नवीन प्रक्रियेचा उलगडा झाला.
या संपूर्ण परिस्थितीबाबत माहिती देताना ऑल इंडिया एलपीजी डिस्ट्रिब्युटर्स असोसिएशनचे (All India LPG Distributors Association) राज्य सचिव आदर्श गुप्ता (Adarsh Gupta) यांनी स्पष्ट केले की, एका आर्थिक वर्षात ग्राहकांना जास्तीत जास्त 12 गॅस मिळण्याची तरतूद आहे. सध्या अनेक कुटुंबांनी ही विहित मर्यादा पूर्ण केली आहे. त्यामुळे अतिरिक्त गॅस हवा असल्यास संबंधितांना आता स्मार्टफोनवर अनिवार्यपणे ॲप डाउनलोड करून त्यात विचारलेल्या कारणांची नोंद करावी लागेल, आणि या प्रक्रियेनंतरच त्यांचे पुढील बुकिंग स्वीकारले जाईल.
ॲपवरील प्रश्नांचे स्वरूप आणि सर्वसामान्यांची गैरसोय
अतिरिक्त गॅस मिळवण्यासाठी कंपनीने ग्राहकांसमोर काही सविस्तर प्रश्नांची यादी ठेवली आहे. यामध्ये प्रामुख्याने तुमच्या कुटुंबातील सदस्यांची एकूण संख्या सहापेक्षा जास्त आहे का, असा सवाल विचारण्यात आला आहे. तसेच, घरी अचानक कोणी नातेवाईक किंवा पाहुणे मुक्कामाला आले आहेत का, याव्यतिरिक्त कुटुंबात लग्नकार्य, एखादी मोठी मेजवानी किंवा इतर कोणताही विशेष कौटुंबिक सोहळा आयोजित करण्यात आला आहे का, आणि इतर घरगुती वापराची कारणे कोणती आहेत, याची सविस्तर माहिती ॲपवर भरणे आता आवश्यक बनले आहे.
या डिजिटल सक्तीमुळे अनेक ग्राहकांसमोर, विशेषतः ग्रामीण आणि शहरी भागातील साधे कीपॅड फोन वापरणाऱ्यांसमोर मोठे आर्थिक संकट उभे राहिले आहे. गरिबांना केवळ गॅस मिळवण्यासाठी नवीन महागडा स्मार्टफोन विकत घेणे आणि ॲप हाताळणे शक्य नाही. परिणामी, घरबसल्या गॅस नोंदणी करण्याच्या सुविधेला अशा ग्राहकांना मुकावे लागणार असून, गॅस मिळवण्यासाठी त्यांना वारंवार एजन्सीच्या कार्यालयात खेटे मारण्याशिवाय दुसरा कोणताही पर्याय उरलेला नाही. या नव्या नियमामुळे ग्राहकांना अधिक माहिती द्यावी लागणार असून, गॅस बुकिंग प्रक्रिया अधिक कडक आणि डिजिटल होत असल्याचे दिसून येत आहे.
