LIC Policy | मुलांच्या शिक्षणासाठी, लग्नासाठी किंवा कुटुंबाच्या आर्थिक सुरक्षिततेसाठी दीर्घकालीन गुंतवणुकीचा विचार करणाऱ्यांसाठी लाइफ इन्शुरन्स कॉर्पोरेशन (Life Insurance Corporation – LIC) ची जीवन लक्ष्य पॉलिसी (Jeevan Lakshya Policy) हा एक महत्त्वाचा पर्याय ठरू शकतो. विमा संरक्षणासोबतच बचतीची संधी देणारी ही योजना दीर्घकालीन आर्थिक नियोजनासाठी उपयुक्त मानली जाते.
योजनेची वैशिष्ट्ये आणि पात्रता :
जीवन लक्ष्य पॉलिसी ही नॉन-लिंक्ड लाइफ अॅश्युरन्स योजना आहे. याचा अर्थ या योजनेचा शेअर बाजाराशी कोणताही संबंध नसून, गुंतवणुकीवर बाजारातील चढ-उतारांचा परिणाम होत नाही. या पॉलिसीमध्ये वार्षिक उत्पन्न लाभाची सुविधाही उपलब्ध असून, कुटुंबाच्या भविष्यातील आर्थिक गरजा पूर्ण करण्यासाठी ती उपयुक्त ठरते.
या योजनेत पॉलिसीधारकाचा मॅच्युरिटीपूर्वी मृत्यू झाल्यास विम्याची संपूर्ण रक्कम नॉमिनी किंवा कायदेशीर वारसाला दिली जाते. 18 वर्षे पूर्ण केलेली कोणतीही व्यक्ती ही पॉलिसी खरेदी करू शकते, तर प्रवेशासाठी कमाल वयोमर्यादा 50 वर्षे निश्चित करण्यात आली आहे.
LIC Policy | गुंतवणूक, प्रीमियम आणि मॅच्युरिटी लाभ :
या पॉलिसीचा कालावधी 13 ते 25 वर्षांदरम्यान निवडता येतो. मॅच्युरिटीचे कमाल वय 65 वर्षे ठेवण्यात आले आहे. विशेष बाब म्हणजे, निवडलेल्या पॉलिसी कालावधीपेक्षा तीन वर्षे कमी कालावधीसाठीच प्रीमियम भरावा लागतो. उदाहरणार्थ, 25 वर्षांची पॉलिसी घेतल्यास केवळ 22 वर्षे प्रीमियम भरावा लागेल. या योजनेत किमान 1 लाख रुपयांचा विमा उपलब्ध असून, कमाल विमा रकमेवर कोणतीही मर्यादा नाही.
उदाहरण म्हणून, 29 वर्षीय व्यक्तीने 15 लाख रुपयांच्या सम इन्शुरन्ससह 25 वर्षांसाठी पॉलिसी घेतल्यास त्याला सुमारे 22 वर्षे प्रीमियम भरावा लागेल. यासाठी दरमहा अंदाजे 5,169 रुपये, म्हणजेच दिवसाला सुमारे 172 रुपये गुंतवावे लागतील. या प्रीमियमवर पहिल्या वर्षी 4.5 टक्के आणि त्यानंतरच्या वर्षांमध्ये 2.25 टक्के जीएसटी लागू होईल. पॉलिसीचा कालावधी पूर्ण झाल्यानंतर बोनससह सुमारे 28.50 लाख रुपयांची एकरकमी रक्कम मिळू शकते. ग्राहकांना मासिक, त्रैमासिक, सहामाही किंवा वार्षिक पद्धतीने प्रीमियम भरण्याचा पर्याय उपलब्ध आहे.
