‘माझ्या मुलीलाही त्याच किल्ल्यावरून खाली ढकला’; सियाच्या वडिलांची संतप्त प्रतिक्रिया

Ketan Agarwal Death | पुण्यातील (Pune) प्रसिद्ध व्यावसायिक केतन अग्रवाल याच्या लोहगड किल्ला (Lohagad Fort) हत्येप्रकरणाने संपूर्ण देश हादरला आहे. या गुन्ह्याचा तपास जसा पुढे सरकत आहे, तसे नवनवीन खुलासे समोर येत आहेत. या संपूर्ण घटनेच्या धक्क्यामुळे मुख्य आरोपी सिया गोयल हिचे वडील प्रवीण गोयल (Praveen Goyal) हे सध्या रुग्णालयात उपचार घेत आहेत. रुग्णालयातूनच माध्यमांशी बोलताना त्यांनी या प्रकरणावर आपली अत्यंत तीव्र आणि आक्रमक प्रतिक्रिया दिली असून, दोषींना थेट मृत्यूदंडासारखीच कडक शिक्षा देण्याची मागणी केली आहे.

“मी केतनला स्वतःच्या मुलासारखं मानलं होतं”

प्रवीण गोयल केतनच्या आठवणींना उजाळा देताना कमालीचे भावूक झाले होते. त्यांनी सांगितले की, अग्रवाल कुटुंबाने त्यांचा मुलगा गमावला आहे, पण त्यांचे जेवढे प्रेम केतनवर होते, त्याहून अधिक प्रेम मी त्याच्यावर करत होतो.

प्रवीण गोयल यांचे खळबळजनक विधान:
“हा आमच्यासाठी अत्यंत काळा दिवस आहे. केतन आणि आमच्यात इतका जिव्हाळा निर्माण झाला होता की, मी त्याला स्वतःच्या मुलासारखेच मानू लागलो होतो. या दुर्दैवी घटनेत केतनला तेव्हाच खरा न्याय मिळेल, जेव्हा दोषीला अत्यंत कठोर शिक्षा होईल. ज्याप्रमाणे आमचा निष्पाप केतन त्या किल्ल्यावरून खाली पडला, त्याचप्रमाणे या हत्येसाठी जो कोणी दोषी असेल — मग ती माझी स्वतःची मुलगी सिया का असेना; जर ती दोषी असेल तर तिलाही त्याच लोहगडावरून खाली ढकलून दिले पाहिजे!”

‘चेतन चौधरी कोण आहे, मला काहीच माहिती नाही’

केतनच्या कुटुंबाने आरोप केला होता की, गोयल कुटुंबाने सियाच्या भूतकाळातील गोष्टी आणि तिच्या व्यसनांबद्दल लपवून ठेवले. या आरोपांवर स्पष्टीकरण देताना प्रवीण गोयल यांनी आपली बाजू मांडली:

सत्य आधी माहीत असते तर…: “जर आम्हाला तिच्याबद्दल किंवा चेतनबद्दल काही गोष्टी आधी माहिती असत्या आणि आम्ही त्या अग्रवाल कुटुंबाला सांगितल्या असत्या, तर कदाचित आज हा काळा दिवस पाहावा लागला नसता आणि केतनचा जीव वाचला असता.”

लग्न ठरल्यापासून सिया आनंदी होती: हे नाते जुळल्यापासून सिया प्रचंड आनंदी दिसत होती. ती नेहमी सांगायची की केतन खूप छान आहे आणि मला खूप चांगले सासर मिळाले आहे. तिच्या मनात असे काही असेल याचा अंदाज नव्हता.

प्रियकर चेतनबद्दल अनभिज्ञता: “सिया केवळ १९ वर्षांची एक साधी-भोळी मुलगी आहे, ती खरोखरच असं काही करू शकते का? तिचा प्रियकर चेतन चौधरी कुठून आला, तो काय करतो, याबद्दल मला काहीच कल्पना नाही. आम्ही यापूर्वी त्याचे नावही कधी ऐकले नव्हते.”

एकीकडे पोलीस कोठडीत सिया आणि चेतनने आपला गुन्हा कबूल केला असताना, दुसरीकडे मुलीच्या या कृत्यामुळे वडिलांनी जाहीरपणे तिच्यावर संताप व्यक्त केल्याने या प्रकरणाला आता कौटुंबिक आणि कायदेशीर स्तरावर एक वेगळेच वळण मिळाले आहे. लोणावळा ग्रामीण पोलीस या प्रकरणाचा पुढील तपास करत आहेत.

News Title: Ketan Agarwal Death Case Updates Siya father Praveen Goyal Statement