ketan Agarwal Death Case | पुण्यातील (Pune) प्रसिद्ध पर्यटन स्थळ असलेल्या लोहगड किल्ल्यावर (Lohagad Fort) काही दिवसांपूर्वी फोटोची पोज देताना एका २४ वर्षीय तरुणाचा दरीत कोसळून मृत्यू झाल्याची घटना घडली होती. सुरुवातीला हा निव्वळ अपघात असल्याचा बनाव केला गेला होता, मात्र लोणावळा ग्रामीण पोलिसांनी (Lonavala Rural Police) केलेल्या सखोल तपासात या घटनेला आता अत्यंत धक्कादायक वळण मिळाले आहे. तो मृत्यू अपघात नसून एक थंड डोक्याने रचलेला खुनाचा कट असल्याचे उघडकीस आले असून, या प्रकरणी मृत तरुणाच्या होणाऱ्या पत्नीसह तिच्या प्रियकराला पोलिसांनी चौकशीसाठी ताब्यात घेतले आहे.
वाढदिवसाच्या ट्रेकिंगचा बनाव आणि हत्येचा कट
केतन विशाल अग्रवाल (वय २४) असे मृत तरुणाचे नाव आहे. गुरुवारी (१८ जून) केतनच्या होणाऱ्या पत्नीचा वाढदिवस होता. हा वाढदिवस खास साजरा करण्यासाठी त्या दोघांनी सकाळीच लोहगड किल्ल्यावर ट्रेकिंगला जाण्याचा बेत आखला होता. गडावर फिरत असताना निसर्गरम्य दरीच्या बाजूला उभे राहून केतन मोबाईल कॅमेऱ्यासमोर फोटोसाठी पोज देत होता. पोलिसांनी दिलेल्या माहितीनुसार, त्याच वेळी ठरलेल्या कटानुसार केतनला थेट खोल दरीत ढकलून देण्यात आले.
तपासात समोर आलेल्या माहितीनुसार, केतनची होणारी पत्नी सिया गोयल हिला या विवाहासाठी अजिबात संमती नव्हती. तिने केतनला आपल्या आयुष्यातून कायमचे दूर करण्यासाठी आपल्या प्रियकराच्या मदतीने हा भयानक कट रचला. सुरुवातीला हा पाय घसरून झालेला अपघात दाखवण्याचा पूर्ण प्रयत्न केला गेला, परंतु पोलिसांच्या तांत्रिक विश्लेषणाने आणि सखोल चौकशीने या दोन्ही संशयितांचा खोटेपणा आणि रचलेला बनाव उघड पाडला.
मदतीचा आरडाओरडा आणि रेस्क्यू ऑपरेशन
केतन दरीत कोसळल्यानंतर गडावर उपस्थित इतर पर्यटकांच्या मदतीने पोलिसांना पाचारण करण्यात आले. घटनेची माहिती मिळताच पोलिसांनी ‘शिवदुर्ग रेस्क्यू टीम’ (Shivdurg Rescue Team) आणि ‘मावळ वन्यजीव पथका’च्या (Mawal Wildlife Team) साह्याने दरीत उतरून शर्थीचे प्रयत्न करत केतनला बाहेर काढले. मात्र, उंचावरून पडल्याने त्याला गंभीर दुखापती झाल्या होत्या आणि रुग्णालयात नेण्यापूर्वीच त्याचा मृत्यू झाला होता. या हत्येमध्ये प्रियकराला आणखी कोणी मदत केली आहे का, याबाबत पोलीस सध्या कसून चौकशी करत आहेत.
नोव्हेंबरमधील भव्य लग्नाचे नियोजन ठरले अपूर्ण
मृत केतन आणि सिया यांचा विवाह निश्चित झाला होता आणि येत्या नोव्हेंबर महिन्यात ते विवाहबंधनात अडकणार होते. लग्नासाठी दोन्ही कुटुंबांनी प्रचंड मोठी तयारी केली होती. राजस्थानमधील जयपूर (Jaipur) येथे तब्बल १७ कोटी रुपये खर्च करून एक आलिशान पॅलेस बुक करण्यात आला होता, तसेच देशभरातून येणाऱ्या पाहुण्यांच्या प्रवासासाठी दोन विशेष विमानांची सोय देखील करण्यात आली होती. मात्र, ज्या मुलीसोबत नवीन आयुष्याची स्वप्ने केतन पाहत होता, तिनेच वाढदिवसाच्या आनंदाचे रूपांतर काही क्षणांत एका मोठ्या शोकांतिकेत केले.
News Title: ketan Agarwal death case update fiancé siya goyal lover accused of pushing him off lohagad fort pune crime
