Ketan Agarwal Case | पुण्यातील(Pune) केतन अग्रवाल(Ketan Agarwal) हत्या प्रकरणात दररोज नवे खुलासे समोर येत असून या घटनेमागील धक्कादायक पैलू उघड होत आहेत. तपासातून मिळालेल्या माहितीनुसार, केतन आणि त्याचे कुटुंब सिया गोयल(Siya Goyal) हिच्यावर मोठ्या प्रमाणात प्रेम आणि विश्वास ठेवत होते. तिचा वाढदिवस अविस्मरणीय करण्यासाठी अग्रवाल कुटुंबाने भव्य नियोजन केले होते. मात्र, त्याच काळात सियाच्या मनात वेगळाच कट शिजत असल्याचा संशय व्यक्त केला जात आहे.
20 जून रोजी सियाचा वाढदिवस साजरा करण्यासाठी महाबळेश्वर(Mahabaleshwar) येथे मोठा कार्यक्रम आयोजित करण्याची तयारी सुरू होती. यासाठी एका पंचतारांकित हॉटेलमधील तब्बल 70 खोल्या आरक्षित करण्यात आल्या होत्या. केतनचे वडील आणि कुटुंबीय या सोहळ्याची तयारी करत होते. मात्र वाढदिवस साजरा करण्यापूर्वीच परिस्थितीने वेगळेच वळण घेतले. वाढदिवसाच्या कार्यक्रमाऐवजी लोहगड किल्ल्यावर(Lohagad Fort) जाण्याचा आग्रह सियाने धरल्याचे समोर आले आहे.
लग्नाची तयारी सुरू, पण संपर्कात होता चेतन :
केतन आणि सिया यांचा फेब्रुवारी महिन्यात साखरपुडा झाला होता. आगामी नोव्हेंबरमध्ये त्यांचा विवाह सोहळा पार पडणार होता. लग्नासाठी विविध स्तरांवर मोठ्या प्रमाणात तयारी सुरू होती. यामध्ये खासगी विमानाची व्यवस्था करण्यात आली होती, तर जयपूर(Jaipur) येथील एक राजवाडाही विवाह सोहळ्यासाठी निश्चित करण्यात आल्याची माहिती समोर आली आहे.
मात्र तपास यंत्रणांच्या दाव्यानुसार, विवाहाच्या तयारीदरम्यान सिया ही चेतन चौधरी(Chetan Choudhari) यांच्या सतत संपर्कात होती. पोलिसांच्या माहितीनुसार, 2025 मध्ये एका व्यावसायिक कार्यक्रमात दोघांची भेट झाली होती. सिया बेकरी व्यवसायाशी संबंधित होती, तर चेतन ड्रायफ्रूट्सच्या व्यापारात कार्यरत होता. या ओळखीचे पुढे घनिष्ठ संबंधांमध्ये रूपांतर झाल्याचा संशय तपासातून व्यक्त केला जात आहे.
Ketan Agarwal Case | केतनला हटवण्याचा कट? :
मात्र आता मिळालेल्या माहितीनुसार, चेतनला केतन हा त्यांच्या नात्यातील मोठा अडथळा वाटत होता. त्यामुळे त्याला मार्गातून दूर करण्यासाठी नियोजनबद्ध कट रचण्यात आल्याचा संशय आहे. या योजनेचा भाग म्हणून सियाने केतनला फिरण्याच्या निमित्ताने दोन वेळा लोहगडावर नेल्याचे सांगितले जात आहे.
मात्र पहिल्या प्रयत्नात तिचा प्लॅन यशस्वी झाला नाही. त्यानंतर पुन्हा एकदा लोहगडावर जाण्याचे नियोजन करण्यात आले. यावेळी केतनला गडावर जाण्याची इच्छा नसतानाही त्याच्यावर दबाव टाकण्यात आल्याचे सांगितले जाते. अखेर दुसऱ्या प्रयत्नात कट यशस्वी झाल्याचा संशय तपास यंत्रणांनी व्यक्त केला आहे. या प्रकरणाचा तपास सुरू असून पोलिसांकडून सर्व पैलूंची सखोल चौकशी करण्यात येत आहे.
