Iran US Conflict | गेल्या 24 दिवसांपासून पेटलेल्या अमेरिका (America) आणि इराण (Iran) यांच्यातील युद्धाच्या पार्श्वभूमीवर एक मोठा दिलासा देणारी घडामोड समोर आली आहे. अमेरिकेचे राष्ट्राध्यक्ष डोनाल्ड ट्रम्प (Donald Trump) यांनी युद्ध थांबवण्याचे सकारात्मक संकेत दिले असून, इराणच्या वीज प्रकल्पांवर आणि ऊर्जा केंद्रांवर होणारे संभाव्य हल्ले 5 दिवसांसाठी स्थगित करण्याची घोषणा केली आहे.
सोमवारी ट्रम्प यांनी त्यांच्या ‘ट्रुथ सोशल’ (Truth Social) या समाजमाध्यमावर एक पोस्ट शेअर करून या महत्त्वपूर्ण निर्णयाची माहिती जगाला दिली. ट्रम्प यांनी आपल्या पोस्टमध्ये स्पष्ट केले की, “गेल्या दोन दिवसांत अमेरिका आणि इराण यांच्यात मध्य पूर्वेतील (Middle East) परस्पर वैर पूर्णपणे संपुष्टात आणण्यासंदर्भात अतिशय चांगली आणि अर्थपूर्ण चर्चा झाली आहे.”
या सखोल आणि विधायक चर्चेतील सकारात्मक वातावरण पाहता, ट्रम्प यांनी अमेरिकेच्या युद्ध विभागाला (Department of Defense) इराणच्या वीज प्रकल्पांवर आणि ऊर्जा पायाभूत सुविधांवर होणारे सर्व प्रकारचे लष्करी हल्ले 5 दिवसांसाठी थांबवण्याचे स्पष्ट निर्देश दिले आहेत.
दोन्ही देशांमधील ही उच्चस्तरीय चर्चा संपूर्ण आठवडाभर सुरू राहणार आहे. 5 दिवसांनंतर हे हल्ले कायमचे थांबणार की पुन्हा सुरू होणार, हा निर्णय पूर्णपणे सध्या सुरू असलेल्या बैठका आणि चर्चा किती यशस्वी ठरतात, यावर अवलंबून असेल असे ट्रम्प यांनी स्पष्ट केले आहे. इराणने याआधी दिलेल्या ‘पाण्यावरील हल्ल्यांच्या’ इशाऱ्यानंतर आणि जागतिक दबावानंतर ट्रम्प प्रशासनाने उचललेले हे पाऊल मध्य-पूर्वेत शांतता प्रस्थापित करण्यासाठी अत्यंत महत्त्वाचे मानले जात आहे.
