इराणचा मोठा हल्ला! भारताला गॅस पुरवणाऱ्या कतारच्या प्रकल्पावरच टाकला बॉम्ब

On: March 19, 2026 11:14 AM
Iran Missile Attack
---Advertisement---

Iran Missile Attack | पश्चिम आशियातील युद्धाचा भडका आता केवळ लष्करी तळांपुरता मर्यादित राहिलेला नाही. इस्रायल आणि अमेरिकेसोबतच्या संघर्षामध्ये इराणने आता एक अत्यंत आक्रमक पाऊल उचलत थेट ऊर्जा प्रकल्पांना लक्ष्य करण्यास सुरुवात केली आहे. ज्याची संपूर्ण जगाला भीती होती, तीच घटना आता घडली असून इराणने कतारच्या गॅस सुविधांवर क्षेपणास्त्र हल्ला चढवला आहे. या हल्ल्यामुळे जागतिक ऊर्जा बाजारात मोठी खळबळ उडाली असून, याचा थेट आणि मोठा फटका भारताच्या एलपीजी (LPG) पुरवठ्याला बसण्याची दाट शक्यता निर्माण झाली आहे.

इस्रायलने इराणच्या ‘दक्षिण पार्स गॅस’ क्षेत्रावर नुकताच हल्ला केला होता. सूडाच्या आगीत जळणाऱ्या इराणने या घटनेचा थेट बदला घेण्यास सुरुवात केली आहे. इराणने कतार, सौदी अरेबिया आणि संयुक्त अरब अमिराती (UAE) मधील तेल आणि गॅस पायाभूत सुविधांना उद्ध्वस्त करण्याच्या धमक्या दिल्या होत्या, ज्या आता वास्तवात उतरत आहेत.

बुधवारी संध्याकाळी इराणने कतारच्या अत्यंत महत्त्वाच्या रास लाफान (Ras Laffan) औद्योगिक शहरावर भीषण क्षेपणास्त्र हल्ला केला. कतार एनर्जीने या वृत्ताला दुजोरा दिला असून त्यांच्या एलएनजी (LNG) प्रकल्पाला मोठी आग लागल्याचे समोर आले आहे. अमेरिका, इस्रायल आणि इराण यांच्यातील या संघर्षामुळे संपूर्ण मध्य पूर्वेतील तणाव आता एका धोकादायक वळणावर पोहोचला आहे.

भारताची गॅस आयात आणि कतारवरील अवलंबित्व आहे. भारताच्या एकूण गॅस आयातीपैकी सर्वात मोठा वाटा कतारचा आहे. त्यामुळे कतारमधील कोणत्याही अस्थिरतेचा थेट परिणाम भारताच्या ऊर्जा सुरक्षेवर होतो. भारताची सध्याची गॅस आयातीची आकडेवारी खालीलप्रमाणे आहे:

कतार: 47 टक्के (दरवर्षी सुमारे 12-13 दशलक्ष टन एलएनजी)

संयुक्त अरब अमिराती (UAE): 24 टक्के

अमेरिका: 11 टक्के

इतर देश: उर्वरित गॅस ओमान, अंगोला आणि नायजेरियामधून आयात केला जातो.

भारतावर होणारा परिणाम आणि एलपीजी सिलिंडरचे दर

होर्मुझच्या सामुद्रधुनी (Strait of Hormuz) परिसरातील वाढत्या तणावामुळे भारताची अनेक गॅस जहाजे सध्या समुद्रात अडकली आहेत. भारत सरकार इराणसोबत सातत्याने वाटाघाटी करून ही जहाजे सुरक्षितपणे परत आणण्याचे प्रयत्न करत आहे. सध्या देशात गॅसची कोणतीही टंचाई नसल्याचे सरकारने स्पष्ट केले असले तरी, भविष्यातील संकटाची चाहूल लागल्याने अनेक ठिकाणी नागरिक सिलिंडरसाठी रांगा लावत असल्याचे चित्र आहे.

भारतात आयात होणाऱ्या एलएनजीचा मोठा भाग घरगुती स्वयंपाकाच्या गॅससाठी (LPG) वापरला जातो. जर कतारवरील हल्ले असेच सुरू राहिले आणि तिथला रास लाफान प्रकल्प पूर्णपणे विस्कळीत झाला, तर भारताला कतारकडून मिळणारा स्वस्त गॅस मिळणे बंद होईल. अशा परिस्थितीत भारताला इतर जागतिक स्रोतांकडून अत्यंत महागड्या दराने गॅस खरेदी करावा लागेल, ज्याचा थेट परिणाम देशांतर्गत एलपीजी सिलिंडरच्या किमती वाढण्यात होईल.

Join WhatsApp Group

Join Now