Iran Israel War | इराणवर (Iran) होणाऱ्या अचूक आणि विनाशकारी हल्ल्यांमागील गूढ उकलण्यासाठी देशांतर्गत तपास यंत्रणांनी मोठी मोहीम हाती घेतली आहे. इस्रायलच्या (Israel) गुप्तचर यंत्रणेला देशातील संवेदनशील ठिकाणांची माहिती पुरवल्याच्या आरोपाखाली इराणने एका तरुणाला नुकतीच फाशीची शिक्षा दिली आहे.
हेरगिरीचा संशय आणि 600 जणांची धरपकड
गेल्या काही दिवसांत इराणच्या अनेक महत्त्वपूर्ण मालमत्तांचे अतोनात नुकसान झाले असून, त्यांचे सर्वोच्च नेते अयातुल्ला अली खामेनी (Ayatollah Ali Khamenei), सुरक्षा प्रमुख लारीजानी (Larijani) यांसारख्या अतिवरिष्ठ अधिकाऱ्यांची सुरक्षाही धोक्यात आली आहे. शत्रूचे हल्ले इतके अचूक कसे बसत आहेत, याची माहिती खुद्द देशातीलच कोणी इस्रायलला देत आहे का, या प्रश्नाने इराणी प्रशासनाची झोप उडवली होती. याच संशयातून देशभरात एक मोठी शोधमोहीम राबवण्यात आली, ज्यामध्ये तब्बल 600 संशयितांना ताब्यात घेण्यात आले आहे. यापैकीच एका व्यक्तीवरील देशद्रोहाचा गुन्हा सिद्ध झाल्याने त्याला मृत्युदंडाची शिक्षा ठोठावण्यात आली.
न्यायव्यवस्थेतील अधिकाऱ्यांनी दिलेल्या माहितीनुसार, सर्वोच्च न्यायालयाने इस्रायलसाठी गुप्तचर म्हणून काम केल्याचा आरोप कायम ठेवल्यानंतर शनिवारी सकाळी अगिल केशवरझ (Agil Keshavarz) याला फासावर लटकवण्यात आले. इस्रायलची निम-सरकारी संस्था असलेल्या मिझान वृत्तसंस्थेने (Mizan News Agency) दिलेल्या वृत्तानुसार, 27 वर्षांचा केशवरझ हा वास्तुकलेचा विद्यार्थी होता. चालू वर्षाच्या सुरुवातीलाच देशाच्या वायव्येकडील उर्मिया (Urmia) शहरात असलेल्या लष्कराच्या मुख्य मुख्यालयाची छायाचित्रे टिपताना त्याला रंगेहाथ पकडण्यात आले होते आणि तेव्हापासून तो कोठडीत होता.
मोसादसाठी 200 मोहिमा आणि कठोर कायदे
मिळालेल्या माहितीनुसार, या देशद्रोही तरुणाने मोसाद (Mossad) आणि इस्रायली लष्करासाठी तब्बल 200 पेक्षा जास्त गुप्त मोहिमा फत्ते केल्याचा खळबळजनक आरोप होता. यामध्ये अतिसंवेदनशील जागांचे फोटो काढणे, त्या भागांचे सर्वेक्षण करणे आणि विशिष्ट मार्गांवरील वाहतुकीवर बारकाईने लक्ष ठेवणे यांसारख्या गंभीर कृत्यांचा समावेश होता. इराणी अधिकाऱ्यांनी स्पष्ट केले की, तो एनक्रिप्टेड मेसेजिंग ॲप्सचा वापर करून परदेशी यंत्रणांशी संपर्कात असायचा आणि प्रत्येक काम पूर्ण झाल्यानंतर त्याला क्रिप्टोकरन्सीच्या स्वरूपात मोबदला दिला जायचा. अमेरिका (America) आणि इराणमधील सध्याच्या तणावपूर्ण वातावरणात मोसादचे एजंट सक्रिय असल्याचा संशय असल्याने इराणने हेरगिरीविरोधात अत्यंत आक्रमक मोहीम उघडली आहे.
जून महिन्यात झालेल्या 12 दिवसांच्या संघर्षानंतर आतापर्यंत किमान 10 जणांना हेरगिरीच्या आरोपावरून फाशी देण्यात आली आहे. शिवाय, ऑक्टोबर महिन्यापासून इराणने आपले कायदे अधिक कडक केले आहेत, ज्यानुसार अमेरिका किंवा इस्रायलसाठी कोणतीही माहिती पुरवणे हा थेट फाशी आणि सर्व संपत्ती जप्त करण्याच्या शिक्षेस पात्र असा गंभीर गुन्हा आहे. दुसरीकडे, नॉर्वेस्थित (Norway) इराण मानवाधिकार संघटनेने (Iran Human Rights Organization) या संपूर्ण प्रक्रियेवर शंका उपस्थित केली असून, आरोपींकडून अनेकदा बळजबरीने गुन्ह्याची कबुली घेतली जात असल्याचा दावा केला आहे. तज्ज्ञांच्या मते, आखाती प्रदेशातील वाढता संघर्ष आणि धोक्यांमुळे इराण आपल्या अंतर्गत सुरक्षेबाबत अत्यंत कठोर पावले उचलत असून, त्यामुळेच अशा प्रकारच्या फाशीच्या शिक्षांचे प्रमाण लक्षणीयरीत्या वाढले आहे.
