Instagram Update | सोशल मीडियावर लोकप्रिय असलेल्या इन्स्टाग्राममध्ये लवकरच मोठा बदल होणार आहे. कंपनीने आपल्या मेसेजिंग सेवेशी संबंधित एक महत्त्वाचे फीचर बंद करण्याचा निर्णय घेतला आहे. त्यामुळे अनेक वापरकर्त्यांमध्ये संभ्रम आणि चिंता निर्माण झाली आहे. या बदलाचा परिणाम काही युजर्सच्या चॅट्स आणि मेसेजिंग सुरक्षेवर होऊ शकतो.
8 मेपासून सुरक्षा फीचर बंद :
सोशल मीडिया कंपनी मेटा (Meta) च्या मालकीचे इन्स्टाग्राम (Instagram) आपल्या डायरेक्ट मेसेजेस (DM) सेवेतून ‘एंड-टू-एंड एन्क्रिप्शन’ (End-to-End Encryption) हे फीचर काढून टाकणार आहे. कंपनीने दिलेल्या माहितीनुसार 8 मे 2026 पासून हे फीचर पूर्णपणे बंद केले जाणार आहे. या निर्णयाची माहिती कंपनीने आपल्या अधिकृत सपोर्ट पेजवर दिली आहे. त्यानंतर या प्लॅटफॉर्मवर एन्क्रिप्टेड मेसेजिंगचा पर्याय उपलब्ध राहणार नाही.
यापूर्वी काही विशिष्ट भागांतील वापरकर्त्यांना अधिक सुरक्षित मेसेजिंगसाठी हा पर्याय दिला जात होता. मात्र कंपनीच्या मते फारच कमी लोक या सुविधेचा वापर करत होते. तसेच वापर कमी असल्यामुळे हे फीचर बंद करण्याचा निर्णय घेण्यात आला आहे. अत्यंत सुरक्षित संवादासाठी वापरकर्त्यांनी व्हॉट्सअॅप (WhatsApp) सारख्या सेवांचा वापर करावा असा सल्लाही देण्यात आला आहे.
Instagram Update | एन्क्रिप्शन म्हणजे काय आणि परिणाम :
एंड-टू-एंड एन्क्रिप्शन ही अशी तंत्रज्ञान पद्धत आहे ज्यामध्ये पाठवलेला मेसेज फक्त पाठवणारा आणि प्राप्त करणारा व्यक्तीच वाचू शकतो. मेसेज पाठवताना तो कोडमध्ये बदलला जातो आणि तो फक्त प्राप्तकर्त्याच्या डिव्हाइसवरच पुन्हा वाचण्यायोग्य बनतो. त्यामुळे प्लॅटफॉर्म चालवणारी कंपनीसुद्धा त्या संदेशांमध्ये डोकावू शकत नाही. डिजिटल गोपनीयतेसाठी हे तंत्रज्ञान सर्वात सुरक्षित मानले जाते. सिग्नल (Signal) आणि व्हॉट्सअॅपसारख्या अनेक अॅप्समध्ये ही सुविधा आधीपासून वापरली जाते.
या बदलामुळे ज्या वापरकर्त्यांनी एन्क्रिप्टेड चॅट्स वापरले आहेत त्यांना त्यांचा डेटा सुरक्षित ठेवण्यासाठी विशेष सूचना दिल्या जाणार आहेत. कंपनीकडून अशा वापरकर्त्यांना मेसेजेस, फोटो किंवा इतर मीडिया फाइल्स डाउनलोड करण्याची सूचना पाठवली जाईल. तसेच एन्क्रिप्टेड डेटा सेव्ह करण्यासाठी अॅपचे नवीन व्हर्जन वापरणे आवश्यक असेल. 8 मेपूर्वी वापरकर्त्यांना नोटिफिकेशन देऊन त्यांच्या चॅट्सचा बॅकअप घेण्याबाबत माहिती दिली जाणार आहे.
