India vs Pakistan | हॉकीप्रेमींसाठी मोठी आनंदाची बातमी आहे. भारत (India) आणि पाकिस्तान (Pakistan) हे कट्टर प्रतिस्पर्धी पुन्हा एकदा आंतरराष्ट्रीय हॉकीच्या मैदानावर आमनेसामने येणार आहेत. एफआयएच पुरुष हॉकी विश्वचषक 2026 स्पर्धेत 19 ऑगस्ट रोजी होणाऱ्या या सामन्याकडे जगभरातील क्रीडाप्रेमींचे लक्ष लागले आहे. दोन्ही संघांमधील ऐतिहासिक प्रतिस्पर्ध्यामुळे या सामन्याची उत्सुकता शिगेला पोहोचली आहे.
19 ऑगस्टला रंगणार हायव्होल्टेज सामना :
भारत आणि पाकिस्तान यांच्यातील विश्वचषकातील लढत 19 ऑगस्ट रोजी रात्री 10.00 वाजता सुरू होणार आहे. या सामन्याचे थेट प्रक्षेपण स्टार स्पोर्ट्स नेटवर्कवर करण्यात येणार असून ऑनलाइन स्ट्रीमिंग जिओहॉटस्टार (JioHotstar) वर उपलब्ध असेल. दोन्ही देशांमधील हॉकी सामने नेहमीच रोमांचक ठरले आहेत आणि यावेळीही चाहत्यांना तितकाच थरार अनुभवायला मिळण्याची अपेक्षा आहे.
यंदाचा विश्वचषक नेदरलँड्स (Netherlands) आणि बेल्जियम (Belgium) यांच्या संयुक्त विद्यमाने 15 ते 30 ऑगस्टदरम्यान आयोजित केला जाणार आहे. या स्पर्धेसाठी पाकिस्तान हॉकी फेडरेशनने 5 ऑगस्ट रोजी 20 सदस्यीय संघ आणि आंतरराष्ट्रीय प्रशिक्षक व व्यवस्थापन पथकाची घोषणा केली आहे. विश्वचषकात पुनरागमन करताना पाकिस्तानचा संघ आपला जुना गौरव पुन्हा मिळवण्याच्या निर्धाराने मैदानात उतरणार आहे.
India vs Pakistan | ‘पूल डी’मध्ये भारत-पाकिस्तानसह बलाढ्य संघ :
आंतरराष्ट्रीय हॉकी महासंघ यांनी भारत आणि पाकिस्तानला ‘पूल डी’ मध्ये स्थान दिले आहे. या गटात इंग्लंड (England) आणि वेल्स (Wales) हे दोन मजबूत युरोपीय संघही असल्यामुळे हा गट स्पर्धेतील सर्वाधिक आव्हानात्मक मानला जात आहे. त्यामुळे बाद फेरीतील स्थान निश्चित करण्यासाठी प्रत्येक सामना दोन्ही संघांसाठी अत्यंत महत्त्वाचा ठरणार आहे.
पाकिस्तान आपल्या मोहिमेची सुरुवात 15 ऑगस्ट रोजी अॅमस्टेलवीन (Amstelveen) येथे इंग्लंडविरुद्ध करणार आहे. त्यानंतर 17 ऑगस्ट रोजी वेल्सविरुद्ध सामना खेळल्यानंतर 19 ऑगस्टला भारताशी त्यांची लढत होईल. या सामन्यात विजय मिळवून गुणतालिकेत आघाडी घेण्याचा दोन्ही संघांचा प्रयत्न असणार असल्याने हा महामुकाबला स्पर्धेतील सर्वाधिक चर्चेचा सामना ठरण्याची शक्यता आहे.
