Dark Neck | उन्हाचा वाढता तडाखा, धूळ आणि त्वचेची योग्य काळजी न घेतल्यामुळे अनेकांच्या मानेवर काळसरपणा दिसून येतो. काही वेळा शरीराच्या इतर भागांच्या तुलनेत मान अधिक काळी दिसते, ज्यामागे विविध कारणे असू शकतात. जर हा त्रास कोणत्याही शारीरिक समस्येमुळे होत नसेल, तर काही सोपे घरगुती उपाय वापरून मानेवरील काळेपणा कमी करण्यास मदत होऊ शकते.
नैसर्गिक घटकांचा नियमित वापर ठरू शकतो फायदेशीर :
मानेवरील काळसरपणा कमी करण्यासाठी संत्र्याच्या सालींचा वापर उपयुक्त ठरू शकतो. संत्र्याच्या सालींमध्ये अँटीऑक्सिडंट्सचे प्रमाण भरपूर असते. हे घटक त्वचेचा रंग गडद होण्यास कारणीभूत ठरणाऱ्या टायरोसिन (Tyrosine) या अमिनो ॲसिडच्या प्रभावाला कमी करण्यास मदत करतात.
यासाठी संत्र्याच्या साली वाळवून त्याची बारीक पूड तयार करावी. त्यानंतर ही पूड दुधामध्ये मिसळून पेस्ट बनवून मानेवर लावावी. नियमित वापर केल्यास त्वचेवरील काळसरपणा हळूहळू कमी होण्यास मदत होऊ शकते.
Dark Neck | त्वचा उजळण्यासाठी इतर घरगुती पर्याय :
ॲपल सायडर व्हिनेगर (Apple Cider Vinegar) मध्ये असलेले मॅलिक ॲसिड (Malic Acid) त्वचेचा पीएच स्तर संतुलित ठेवण्यास मदत करते. तसेच त्वचेवरील मृत पेशी दूर करून नैसर्गिक चमक वाढवण्यासही त्याचा उपयोग होतो. यासाठी दोन चमचे ॲपल सायडर व्हिनेगरमध्ये तितकेच पाणी मिसळून कापसाच्या सहाय्याने मानेवर लावावे. सुमारे दहा मिनिटांनंतर साध्या पाण्याने मान स्वच्छ धुवावी.
बटाट्याच्या रसामध्ये त्वचा उजळवणारे गुणधर्म आढळतात. एका लहान बटाट्याचा रस काढून तो मानेवर लावून हलक्या हाताने मालिश करावी. रस पूर्णपणे सुकल्यानंतर स्वच्छ पाण्याने धुवून टाकावा. याशिवाय बेकिंग सोडा (Baking Soda) हा नैसर्गिक एक्सफोलिएटर म्हणून काम करतो. दोन ते तीन चमचे बेकिंग सोडा आणि समान प्रमाणात पाणी एकत्र करून तयार केलेले मिश्रण मानेवर लावावे आणि दहा मिनिटांनंतर धुवावे.
बदामाच्या तेलात व्हिटॅमिन ई (Vitamin E) मुबलक प्रमाणात असते. त्वचा मऊ, गुळगुळीत आणि निरोगी ठेवण्यासाठी हा घटक महत्त्वाचा मानला जातो. मानेवरील काळसर डाग कमी करण्यासाठी बदामाचे तेल आणि खोबरेल तेल एकत्र मिसळून प्रभावित भागावर हलक्या हाताने मसाज करावा. सुमारे पंधरा मिनिटांनंतर पाण्याने मान स्वच्छ धुवावी.
