मोदींच्या आवाहनानंतर सरकारचा मोठा निर्णय; सोन्याच्या आयात शुल्कात वाढ, वाचा लेटेस्ट दर

Gold Price Today | केंद्र सरकारने सोन्याच्या आयात शुल्कात (Import Duty) मोठी वाढ केल्यामुळे भारतीय सराफा बाजारात सोन्या-चांदीच्या किमतींनी नवा उच्चांक गाठला आहे. पंतप्रधान नरेंद्र मोदी यांनी आगामी वर्षभर सोने खरेदी न करण्याचे आवाहन केल्यानंतर, देशाची परकीय चलन गंगाजळी सुरक्षित ठेवण्यासाठी सरकारने हा कठोर निर्णय घेतला आहे.

सोन्याच्या आयात शुल्कात ६ टक्क्यांवरून १५ टक्क्यांपर्यंत वाढ

देशाच्या परकीय चलन साठ्यावरील दबाव कमी करण्यासाठी आणि मौल्यवान धातूंची आयात मर्यादित करण्यासाठी केंद्र सरकारने बुधवारी महत्त्वपूर्ण अधिसूचना जारी केली. यापूर्वी सोन्यावर ६ टक्के आयात शुल्क आकारले जात होते, जे आता थेट १५ टक्के करण्यात आले आहे. सरकारच्या या निर्णयामुळे सोन्याच्या आयातीवर मोठ्या प्रमाणावर निर्बंध येतील आणि देशांतर्गत किमतींमध्ये वाढ होऊन ग्राहक सोने खरेदीपासून दूर राहतील, अशी अपेक्षा व्यक्त केली जात आहे.

सोन्या-चांदीच्या दरात ऐतिहासिक वाढ
आयात शुल्कातील वाढीची घोषणा होताच कमोडिटी मार्केटमध्ये (MCX) सोने आणि चांदीच्या भावाने मोठी उसळी घेतली आहे. आज १३ मे रोजी समोर आलेली आकडेवारी खालीलप्रमाणे आहे:

सोने: सोन्याच्या दरात प्रति १० ग्रॅममागे तब्बल ९,००० रुपयांची वाढ झाली असून, तो १,६२,६४८ रुपयांवर पोहोचला आहे.

चांदी: चांदीच्या दरातही प्रति किलो १६,००० रुपयांची भरमसाठ वाढ झाली असून, चांदी आता २,६५,८०५ रुपये प्रति किलो या दराने विकली जात आहे.

जागतिक बाजारपेठेतही (COMEX) सोन्याचे भाव ०.५१ टक्क्यांनी वधारून ४,७११ वर पोहोचले आहेत. स्थानिक आणि जागतिक अशा दोन्ही पातळ्यांवर किमती वाढल्याने सर्वसामान्यांच्या खिशाला मोठा फटका बसणार आहे.

सरकारचे ‘सोने खरेदी’ रोखण्यासाठीचे प्रयत्न
पंतप्रधानांनी २४ तासांत दोनदा जनतेला सोने खरेदी टाळण्याचे आवाहन केले होते. सोन्याची आयात करण्यासाठी देशाला मोठ्या प्रमाणावर परकीय चलन खर्च करावे लागते, जे सध्याच्या जागतिक अस्थिरतेच्या काळात आव्हानात्मक ठरत आहे. त्यामुळेच सरकारने केवळ भावनिक आवाहन न करता, तांत्रिकदृष्ट्या आयात शुल्क वाढवून ग्राहकांना सोने खरेदी करण्यापासून परावृत्त करण्याचा प्रयत्न केला आहे. येत्या काळात सोने खरेदीवर अधिक कडक निर्बंध लादले जाण्याची शक्यता वर्तवली जात आहे, जेणेकरून कोणत्याही परिस्थितीमध्ये अनावश्यक आयात रोखता येईल.

News Title: Gold Price Today Import Duty Hiked To 15 Percent Prices Surge