Gas Cylinder Booking Rules | देशात एलपीजी सिलेंडरच्या पुरवठ्याबाबत काही बदल दिसत असून अनेक ग्राहकांना वितरण उशिरा मिळत आहे. आखाती देशांमधील तणावामुळे पुरवठा साखळीवर थोडा परिणाम झाला असला तरी गॅसची कमतरता नसल्याचे स्पष्ट करण्यात आले आहे. मात्र, वाढलेल्या मागणीमुळे वितरण प्रक्रियेत विलंब जाणवत आहे.
डिलिव्हरी वेळ वाढला; नवा नियम लागू
पेट्रोलियम आणि नैसर्गिक वायू मंत्रालय (Ministry of Petroleum and Natural Gas) च्या सहसचिव सुजाता शर्मा (Sujata Sharma) यांनी सांगितले की, पूर्वी २ ते ३ दिवसांत मिळणारा सिलेंडर आता ४ ते ५ दिवसांत पोहोचत आहे. त्यामुळे ग्राहकांना सुमारे २ दिवस अधिक प्रतीक्षा करावी लागत आहे.
सुरक्षिततेच्या दृष्टीने आता ओटीपी प्रणाली बंधनकारक करण्यात आली आहे. सिलेंडर स्वीकारताना ग्राहकांनी मिळालेला ओटीपी फक्त अधिकृत वितरण कर्मचाऱ्यालाच द्यावा, असेही आवाहन करण्यात आले आहे, जेणेकरून कोणत्याही प्रकारची फसवणूक टाळता येईल.
वितरण उशिराचे मुख्य कारण गॅसची कमतरता नसून, लोकांकडून घाबरून मोठ्या प्रमाणावर केले जाणारे बुकिंग आहे. अनेक ग्राहक सिलेंडर संपण्यापूर्वीच नवीन बुकिंग करत असल्याने मागणीत सुमारे ६० टक्क्यांची वाढ झाली आहे. या अतिरिक्त मागणीमुळे वितरण यंत्रणेवर ताण आला असून, तात्पुरता विलंब होत आहे. मात्र, अधिकाऱ्यांच्या मते ही परिस्थिती लवकरच सुधारेल आणि पुरवठा पुन्हा सुरळीत होईल.
बुकिंगसाठी ठरलेले नियम आणि सरकारचे आवाहन
नियमांनुसार, शहरांमध्ये सिलेंडर मिळाल्यानंतर २५ दिवसांनी पुढील बुकिंग करता येते, तर ग्रामीण भागात हा कालावधी ४५ दिवसांचा आहे. हे नियम सर्व ग्राहकांसाठी समान आहेत.सरकारने नागरिकांना विनाकारण गॅस बुकिंग टाळण्याचे आवाहन केले आहे. देशात एलपीजी, पेट्रोल आणि डिझेलचा पुरेसा साठा उपलब्ध असल्यामुळे तुटवड्याची भीती बाळगण्याची गरज नाही. संयम राखल्यास सर्वांना वेळेवर गॅस मिळू शकतो.
