Gas Black Marketing | पुणे (Pune) शहरातील हांडेवाडी परिसरात घरगुती गॅस सिलेंडर्सचा अवैध साठा करून त्याचा काळाबाजार करणाऱ्या एका मोठ्या अड्ड्यावर काळेपडळ पोलिसांनी (Kalepadal Police) छापा टाकला आहे. या कारवाईत पोलिसांनी १०३ सिलेंडर्ससह सुमारे १० लाख रुपयांचा मुद्देमाल जप्त केला असून एका आरोपीला बेड्या ठोकल्या आहेत.
नेमकी कारवाई काय?
शहरातील अवैध धंद्यांविरुद्ध सुरू असलेल्या मोहिमेदरम्यान पोलीस अंमलदार महादेव शिंदे यांना हांडेवाडी परिसरात गॅसची अवैध रिफिलिंग होत असल्याची गोपनीय माहिती मिळाली होती. या माहितीच्या आधारे ‘काव्या मल्टी सर्व्हिसेस’ (Kavya Multi Services) या दुकानावर छापा टाकला असता, तिथे उभ्या असलेल्या टेम्पोमध्ये आणि दुकानामध्ये घरगुती व व्यावसायिक गॅस टाक्यांचा मोठा साठा आढळून आला.
अत्यंत धोकादायक पद्धतीने रिफिलिंग
पोलिसांनी धाड टाकली तेव्हा आरोपी नितीन हनुमंत होळकर (वय ३८, रा. हांडेवाडी) हा घरगुती गॅस सिलेंडर्समधून व्यावसायिक आणि ५ किलोच्या छोट्या टाक्यांमध्ये अत्यंत धोकादायक पद्धतीने गॅस ट्रान्सफर करत असल्याचे उघड झाले. यामुळे परिसरात मोठी दुर्घटना घडण्याची शक्यता होती. आरोपीकडे या व्यवसायाचा किंवा साठवणुकीचा कोणताही परवाना नव्हता.
पोलिसांनी एकूण १०३ गॅस सिलेंडर्स आणि गुन्ह्यात वापरलेला टेम्पो असा मिळून १० लाख ९ हजार ३०० रुपयांचा मुद्देमाल जप्त केला आहे. नितीन हनुमंत होळकर याला अटक करण्यात आली आहे. आरोपीविरोधात काळेपडळ पोलीस ठाण्यात अत्यावश्यक वस्तू अधिनियमाच्या (Essential Commodities Act) कलम ३ आणि ७ नुसार गुन्हा दाखल करण्यात आला आहे.
ही कारवाई पोलीस उपआयुक्त राजकुमार शिंदे, सहाय्यक पोलीस आयुक्त अतुलकुमार नवगिरे यांच्या मार्गदर्शनाखाली वरिष्ठ पोलीस निरीक्षक मानसिंग पाटील आणि त्यांच्या पथकाने यशस्वीरित्या पार पाडली.
News Title: Gas Black Marketing Exposed in Handewadi Pune
