Fridge Temperature | उन्हाळ्याच्या दिवसांत तापमान झपाट्याने वाढत असल्याने घराघरात फ्रिजचा वापर अधिक प्रमाणात होतो. बाहेरील उष्णतेमुळे फ्रिजमधील थंडावा कायम ठेवणे थोडे कठीण ठरते. चुकीचे सेटिंग केल्यास अन्नपदार्थ खराब होण्याची शक्यता असते तसेच विजेचा खर्चही वाढू शकतो. त्यामुळे उन्हाळ्यात फ्रिज कोणत्या नंबरवर ठेवणे योग्य आहे, हे जाणून घेऊया.
फ्रिजची योग्य सेटिंग
उन्हाळ्यात बाहेरचे तापमान जास्त असल्यामुळे फ्रिजची कूलिंग थोडी वाढवणे आवश्यक असते. बहुतांश फ्रिजमध्ये 1 ते 5, 1 ते 7 किंवा 1 ते 9 अशा प्रकारचे नंबर असलेला डायल (Dial) असतो. हे नंबर तापमानाच्या अंशांचे मोजमाप नसून कूलिंगची तीव्रता दर्शवतात.
जर तुमच्या फ्रिजमध्ये 1 ते 5 अशी स्केल असेल, तर उन्हाळ्यात तो 3 ते 4 या नंबरवर ठेवणे योग्य मानले जाते. तर 1 ते 7 किंवा 1 ते 9 स्केल असलेल्या फ्रिजमध्ये 5 ते 6 हा नंबर निवडणे चांगले ठरते. लक्षात ठेवण्यासारखी बाब म्हणजे मोठा नंबर निवडल्यास फ्रिज अधिक थंडावा निर्माण करतो, कारण कूलिंगची ताकद वाढते.
फ्रिजचे आदर्श तापमान आणि स्केलचा अर्थ
डिजिटल डिस्प्ले असलेल्या फ्रिजमध्ये तापमान थेट अंशांमध्ये सेट करता येते. अशा वेळी फ्रिज विभागाचे तापमान साधारणपणे 3°C ते 5°C दरम्यान ठेवणे सुरक्षित मानले जाते. तर फ्रीजर (Freezer) विभागासाठी -18°C ते -23°C हे तापमान योग्य समजले जाते, ज्यामुळे अन्नपदार्थ जास्त काळ सुरक्षित राहतात.
फ्रिजमधील नंबर प्रत्यक्ष तापमान दाखवत नाहीत, तर कूलिंग पॉवर दर्शवतात. कमी नंबर जसे 1 किंवा 2 हे तुलनेने उबदार सेटिंग असते, जेव्हा फ्रिजमध्ये कमी सामान असते किंवा हिवाळ्यात वापरले जाते. 3 किंवा 4 हे मध्यम व सर्वसाधारण वापरासाठी योग्य सेटिंग मानले जाते. तर 5, 7 किंवा 9 सारखे जास्त नंबर सर्वाधिक थंडावा देतात, कारण त्या वेळी कॉम्प्रेसर जास्त वेळ चालतो. काही फ्रिजमध्ये ‘0’ नंबर असतो, ज्याचा अर्थ कूलिंग पूर्णपणे बंद (OFF) होणे असा होतो आणि साफसफाई किंवा डीफ्रॉस्टिंग करताना तो वापरला जातो.
ऋतुमानानुसार फ्रीजच्या तापमानात योग्य तो बदल केल्यास केवळ अन्नच सुरक्षित आणि ताजे राहत नाही, तर कॉम्प्रेसरवर अतिरिक्त ताण न आल्याने विजेचीही मोठी बचत होते. त्यामुळे आजच तुमच्या फ्रीजचे सेटिंग तपासा आणि उन्हाळ्यासाठी ते योग्य नंबरवर सेट करा.
