Post Office RD | सुरक्षित गुंतवणुकीचा पर्याय शोधणाऱ्यांसाठी पोस्ट ऑफिसची रेकरिंग डिपॉझिट (Recurring Deposit) योजना आकर्षक ठरत आहे. सरकारच्या हमीसह उपलब्ध असलेल्या या योजनेत नियमित बचत करून मोठा निधी उभारता येतो. ठराविक कालावधीपर्यंत सातत्याने गुंतवणूक केल्यास केवळ व्याजाच्या स्वरूपातही 5 लाख रुपयांपेक्षा अधिक रक्कम मिळू शकते.
सरकारची हमी, आकर्षक व्याजदर :
जोखीम न घेता निश्चित परतावा मिळवू इच्छिणाऱ्या गुंतवणूकदारांसाठी पोस्ट ऑफिसची स्मॉल सेव्हिंग्स योजना (Small Savings Scheme) हा विश्वासार्ह पर्याय मानला जातो. या योजनांमधील गुंतवणुकीला केंद्र सरकारची हमी असल्यामुळे गुंतवणूक पूर्णपणे सुरक्षित समजली जाते. त्यामुळे बँकेतील अनेक मुदतठेवींपेक्षा या योजनेकडे नागरिकांचा अधिक कल वाढत आहे.
पोस्ट ऑफिसच्या रेकरिंग डिपॉझिट योजनेत सध्या वार्षिक 6.7 टक्के व्याजदर दिला जात आहे. कोणत्याही जवळच्या पोस्ट ऑफिसमध्ये जाऊन आरडी खाते सहज उघडता येते. या खात्याची सुरुवात केवळ 100 रुपयांच्या मासिक गुंतवणुकीपासून करता येते. तसेच कमाल गुंतवणुकीवर कोणतीही मर्यादा नसल्याने आपल्या आर्थिक क्षमतेनुसार कितीही रक्कम जमा करता येते.
Post Office RD | लोनची सुविधा आणि 5 लाख व्याजाचे गणित :
पोस्ट ऑफिस आरडी योजनेचा मुदतकाल पाच वर्षांचा आहे. मात्र, गरज भासल्यास मॅच्योरिटीपूर्वी खाते बंद करण्याची सुविधाही उपलब्ध आहे. तरीही योजनेचा पूर्ण लाभ मिळवण्यासाठी गुंतवणूक मुदतपूर्तीपर्यंत कायम ठेवणे अधिक फायदेशीर मानले जाते. याशिवाय खाते सुरू करून एक वर्ष पूर्ण झाल्यानंतर जमा रकमेच्या 50 टक्क्यांपर्यंत कर्ज घेण्याची सुविधाही उपलब्ध आहे. या कर्जावर निर्धारित नियमांनुसार केवळ 2 टक्के व्याज आकारले जाते.
या योजनेत दरमहा 10 हजार रुपये पाच वर्षांसाठी गुंतवल्यास एकूण 6 लाख रुपयांची गुंतवणूक होते. 6.7 टक्के व्याजदरानुसार मुदतपूर्तीवेळी एकूण रक्कम सुमारे 7,13,659 रुपये मिळते. यानंतर हीच मासिक 10 हजार रुपयांची गुंतवणूक आणखी पाच वर्षे म्हणजे एकूण 10 वर्षे सुरू ठेवल्यास खात्यातील एकूण निधी 17,08,546 रुपयांपर्यंत पोहोचतो. यामध्ये केवळ व्याजाच्या स्वरूपात मिळणारी रक्कम 5,08,546 रुपये इतकी होते. त्यामुळे दीर्घकालीन आणि नियमित गुंतवणूक करणाऱ्यांसाठी पोस्ट ऑफिसची आरडी योजना फायदेशीर पर्याय ठरू शकते.
