‘मला शिव्या द्या पण..’; मिसिंग लिंकवरून देवेंद्र फडणवीस विरोधकांवर कडाडले

On: July 9, 2026 7:40 AM
Devendra Fadnavis
---Advertisement---

Devendra Fadnavis | मुंबई-पुणे द्रुतगती मार्गावरील अत्यंत महत्त्वाकांक्षी ‘Missing Link’ प्रकल्पाबाबत विरोधकांकडून केले जाणारे सर्व आरोप मुख्यमंत्र्यांनी पूर्णपणे फेटाळून लावले आहेत. “महायुती सरकारमध्ये धाडस होते, म्हणूनच हा अत्यंत कठीण प्रकल्प पूर्ण होऊ शकला,” अशा शब्दांत त्यांनी विरोधकांचा खोटारडेपणा उघड केला. नुकत्याच झालेल्या दरड कोसळण्याच्या घटनेवरून राजकारण करणाऱ्यांना त्यांनी विधानसभेत कडक इशारा दिला आहे.

आयआयटीच्या तज्ज्ञांकडून नवीन सुरक्षा आराखडा; चुकांमधून शिकलो

बोगद्याच्या मुखाशी दरड कोसळल्याच्या घटनेचा संदर्भ देत मुख्यमंत्र्यांनी सांगितले की, या आपत्तीने तांत्रिकदृष्ट्या अनेक गोष्टी शिकवल्या आहेत. निसर्गातील पाण्याचा प्रवाह कसा बदलतो आणि दरड कशी कोसळते, याचे गांभीर्य लक्षात घेऊन तात्काळ आयआयटीच्या (IIT) तज्ज्ञांशी चर्चा करण्यात आली आहे. तज्ज्ञांनी दिलेल्या नवीन सुरक्षा आराखड्याची (Safety Plan) अंमलबजावणी केली जात असून, भविष्यात अशा घटना रोखण्यासाठी हा आराखडा अत्यंत प्रभावी ठरेल, असा विश्वास त्यांनी व्यक्त केला.

‘आघाडी सरकारने १४ कारणे सांगून फाईल बंद केली होती’

माजी मुख्यमंत्री पृथ्वीराज चव्हाण यांचे नाव न घेता देवेंद्र फडणवीस यांनी तत्कालीन आघाडी सरकारवर जोरदार निशाणा साधला. ते म्हणाले, “या महत्त्वाच्या कनेक्टिंग लिंकचा मूळ प्रस्ताव मागच्या सरकारनेच तयार केला होता. मात्र, तत्कालीन मुख्यमंत्र्यांनी तब्बल १४ तांत्रिक कारणे पुढे करत, हा प्रकल्प पूर्ण करणे अशक्य असल्याचे सांगून त्याची फाईल कायमची बंद करून टाकली होती. आम्ही ती फाईल पुन्हा उघडून हा प्रकल्प प्रत्यक्षात आणला.”

अभियांत्रिकीचा अद्भुत चमत्कार; ७ हजार कोटी पाण्यात गेल्याचा दावा खोटा

प्रकल्पाच्या झालेल्या नुकसानीबाबत समाजमाध्यमांवरून पसरवल्या जाणाऱ्या अफवांचा मुख्यमंत्र्यांनी तीव्र शब्दांत निषेध केला. दरड केवळ बोगद्याच्या कमानीवर (Portal) कोसळली असून आतील बोगदा किंवा मुख्य पुलाला (Cable-Stayed Bridge) कोणतीही इजा झालेली नाही, हे त्यांनी स्पष्ट केले.

“७ हजार कोटी पाण्यात गेले, असा खोटा प्रचार करणाऱ्यांनी हे लक्षात ठेवावे की, हा केवळ रस्ता नसून जगातील सर्वात रुंद बोगदा आणि भारतातील सर्वात उंच केबल पूल असलेला एक अभियांत्रिकी चमत्कार (Engineering Marvel) आहे,” असे ते म्हणाले. या लिंकमुळे बोरघाटातील वाहतूक कोंडी आणि जीवघेणे अपघात कायमचे संपले आहेत.

सोशल मीडियावरील ‘भाड्याच्या तट्टूंना’ कडक इशारा
“राजकीय द्वेषातून तुम्ही मला कितीही शिव्या द्या, मी आता पूर्णपणे ‘शिव्याप्रूफ’ झालो आहे. परंतु, स्वतःच्या राजकीय स्वार्थासाठी महाराष्ट्राच्या प्रतिमेला जागतिक स्तरावर बदनाम करू नका,” असे आवाहन मुख्यमंत्र्यांनी केले. सोशल मीडियावर पैसे घेऊन या प्रकल्पाविषयी नकारात्मकता पसरवणाऱ्या घटकांचा उल्लेख त्यांनी ‘भाड्याचे तट्टू’ असा केला. “महाराष्ट्राचा आणि येथील महान प्रकल्पांचा अपमान करणाऱ्यांना अजिबात सोडले जाणार नाही,” असा थेट इशारा देत मुख्यमंत्र्यांनी आपले भाषण पूर्ण केले.

News Title: Devendra Fadnavis Assembly Reply Mumbai Pune Expressway Missing Link

Join WhatsApp Group

Join Now