FIFA World Cup 2026 | फिफा वर्ल्ड कप 2026 (FIFA World Cup 2026) स्पर्धेत यजमान कॅनडा (Canada) आणि कतार (Qatar) यांच्यात झालेल्या सामन्यानंतर मोठा गोंधळ उडाल्याची घटना समोर आली आहे. बीसी प्लेस स्टेडियम (BC Place Stadium) येथे खेळवण्यात आलेल्या या सामन्यात कॅनडाने 6-0 असा एकतर्फी विजय मिळवला. मात्र, सामन्यानंतर दोन्ही संघांच्या खेळाडूंमध्ये झालेल्या धक्काबुक्कीमुळे मैदानावरील वातावरण तापले.
जोनाथन डेव्हिडची हॅट्ट्रिक, कतारचा पराभव :
सामन्याच्या सुरुवातीपासूनच कॅनडाच्या संघाने आक्रमक खेळाचे प्रदर्शन केले. कतारला संपूर्ण सामन्यात एकही गोल करता आला नाही. कॅनडाकडून जोनाथन डेव्हिड (Jonathan David) याने सलग तीन गोल करत हॅट्ट्रिक नोंदवली. याशिवाय काइल लारिन (Kyle Larin) आणि नाथन सॅलिबा (Nathan Saliba) यांनी प्रत्येकी एक गोल केला. कॅनडाचा सहावा गोल कतारच्या खेळाडूकडून स्वयंगोलच्या स्वरूपात झाला.
सामन्याच्या 53 व्या मिनिटाला कतारचा मिडफिल्डर आसिम मादिबो (Assim Madibo) याने कॅनडाचा खेळाडू इस्माईल कोने (Ismael Kone) याच्यावर जोरदार टॅकल केले. या धडकेत कोने गंभीर जखमी झाला. त्याला तातडीने स्ट्रेचरवरून मैदानाबाहेर नेण्यात आले आणि पुढील उपचारांसाठी रुग्णालयात दाखल करण्यात आले. या घटनेनंतर व्हिडीओ असिस्टंट रेफरी (VAR) च्या मदतीने निर्णय घेत रेफरीने मादिबोला रेड कार्ड दाखवले. याआधी कतारचा खेळाडू होमाम अहमद (Homam Ahmed) यालाही मैदानाबाहेर पाठवण्यात आल्याने कतारचा संघ केवळ नऊ खेळाडूंसह खेळत होता.
FIFA World Cup 2026 | प्रशिक्षकांमधील वादानंतर तणाव वाढला :
सामना संपल्यानंतर कॅनडाचे मुख्य प्रशिक्षक जेसी मार्श (Jesse Marsch) हे कतारचे व्यवस्थापक ज्युलेन लोपेटेगुई (Julen Lopetegui) यांच्याशी हस्तांदोलन करण्यासाठी गेले. यावेळी दोघांमध्ये शाब्दिक वाद झाला. मार्श यांच्या वर्तनावर कतारच्या खेळाडूंनी नाराजी व्यक्त केल्यानंतर दोन्ही संघांचे खेळाडू आणि सपोर्ट स्टाफ यांच्यात बाचाबाची सुरू झाली.
काही क्षणांतच हा वाद धक्काबुक्कीपर्यंत पोहोचला. परिस्थिती नियंत्रणाबाहेर जात असल्याचे लक्षात येताच सुरक्षा कर्मचारी आणि स्पर्धा अधिकाऱ्यांनी हस्तक्षेप करत दोन्ही संघांना वेगळे केले. दरम्यान, या सामन्यात हॅट्ट्रिक करणारा जोनाथन डेव्हिड हा यजमान देशाचे प्रतिनिधित्व करत फिफा विश्वचषकात हॅट्ट्रिक नोंदवणारा पहिला खेळाडू ठरला आहे.
