Harshwardhan Sapkal | काँग्रेसचे प्रदेशाध्यक्ष हर्षवर्धन सपकाळ (Harshwardhan Sapkal) यांनी छत्रपती शिवाजी महाराज यांच्याबाबत केलेल्या वक्तव्यामुळे राज्यातील राजकीय वातावरण तापले आहे. त्यांनी शिवाजी महाराजांची तुलना टिपू सुलतान यांच्याशी केल्याचा आरोप होत असून त्यावर तीव्र संताप व्यक्त केला जात आहे. या पार्श्वभूमीवर भारतीय जनता पार्टी (Bharatiya Janata Party) कडून आक्रमक भूमिका घेत बक्षीस जाहीर करण्यात आले आहे.
अहिल्यानगरमधील आंदोलन आणि घोषणा :
अहिल्यानगरमध्ये भाजपने सपकाळ यांच्या विरोधात जोरदार आंदोलन सुरू केले आहे. छत्रपती शिवाजी महाराज स्मारकासमोर जोडे मारो आंदोलन छेडण्यात आले असून अनेक कार्यकर्त्यांनी यात सहभाग घेतला. यावेळी भाजप आमदार नारायण कुचे (Narayan Kuche) यांनी सपकाळ यांची जीभ कापणाऱ्यास १० लाख रुपये देण्यात येतील, अशी घोषणा केली. तसेच त्यांच्या तोंडाला काळे फासणाऱ्यास २ लाख रुपयांचे बक्षीस देण्यात येईल, असेही त्यांनी जाहीर केले.
या आंदोलनात शहर जिल्हाध्यक्ष अनिल मोहिते (Anil Mohite) आणि जिल्हा उपाध्यक्ष बाबासाहेब सानप (Babasaheb Sanap) यांनीही संतप्त प्रतिक्रिया नोंदवली. सपकाळ यांच्या वक्तव्याचा निषेध करत भाजप कार्यकर्त्यांनी घोषणाबाजी केली. राज्यभरातून या प्रकरणावर प्रतिक्रिया उमटत असून वातावरण ढवळून निघाले आहे.
Harshwardhan Sapkal | जालन्यात पडसाद, काँग्रेसची प्रतिक्रिया :
जालना येथेही या वक्तव्याचे पडसाद उमटले. भाजप पदाधिकाऱ्यांनी रस्त्यावर उतरून सपकाळ यांच्या विरोधात घोषणाबाजी केली. आमदार नारायण कुचे आणि भास्कर दानवे (Bhaskar Danve) यांच्या नेतृत्वाखाली हे आंदोलन पार पडले. काँग्रेसचे खासदार कल्याण काळे (Kalyan Kale) यांच्या कार्यालयासमोर भाजपकडून निदर्शने करण्यात आली. दरम्यान, काँग्रेस कार्यकर्त्यांनीही प्रत्युत्तर देत आपली भूमिका मांडली.
या वादावर काँग्रेसचे माजी प्रदेशाध्यक्ष नाना पटोले (Nana Patole) यांनी प्रतिक्रिया दिली. त्यांनी सांगितले की सपकाळ यांनी नेमके काय वक्तव्य केले याची त्यांना माहिती नाही; मात्र छत्रपती शिवाजी महाराजांची तुलना कोणत्याही इतर ऐतिहासिक व्यक्तीशी होऊ शकत नाही. छत्रपती ही उपाधी केवळ त्यांच्या नावाशीच जोडली जाते, असे त्यांनी माध्यमांशी बोलताना स्पष्ट केले. या संपूर्ण घडामोडींमुळे राज्यातील राजकारणात नव्या वादाला तोंड फुटले आहे.
