Ayesha Khan Engagement | अभिनेत्री आयेशा खान (Ayesha Khan) हिच्या एका सोशल मीडिया पोस्टने सध्या चाहत्यांचे लक्ष वेधून घेतले आहे. ‘धुरंधर’ आणि ‘बिग बॉस 17’ या प्रोजेक्ट्समुळे चर्चेत असलेल्या आयेशाने एका मिस्ट्री मॅनसोबतचे फोटो शेअर केले आहेत. विशेष म्हणजे, या फोटोंमध्ये तिच्या बोटात दिसणाऱ्या हिऱ्याच्या अंगठीमुळे अवघ्या 23 व्या वर्षी साखरपुडा केल्याच्या चर्चांना सुरुवात झाली आहे.
मिस्ट्री मॅनसोबतचे फोटो व्हायरल :
सोशल मीडियावर प्रेमसंबंध जाहीर करण्यासाठी सेलिब्रिटी अनेकदा थेट घोषणा न करता सूचक पद्धतीचा वापर करतात. यालाच सोशल मीडिया जगतात ‘सॉफ्ट लॉन्च’ म्हटलं जातं. आयेशा खाननेही नुकतेच काही फोटो पोस्ट केल्याने तिच्या चाहत्यांमध्ये अशाच प्रकारच्या चर्चा सुरू झाल्या आहेत. या छायाचित्रांमध्ये तिच्यासोबत एक व्यक्ती दिसत आहे; मात्र त्याचा चेहरा कुठेही स्पष्टपणे दाखवण्यात आलेला नाही. त्यामुळे तो व्यक्ती नेमका कोण आहे, याबाबत उत्सुकता वाढली आहे.
आयेशाच्या या पोस्टमध्ये सर्वाधिक लक्ष तिच्या हाताकडे गेले आहे. तिच्या बोटात चमकणारी डायमंड रिंग दिसत असल्याने तिने साखरपुडा केला आहे का, असा सवाल चाहते उपस्थित करत आहेत. विशेष म्हणजे, आयेशाचे वय अवघे 23 वर्षे असल्याने या चर्चेला आणखी रंग चढला आहे. मात्र अभिनेत्रीने या फोटोंसोबत साखरपुड्याची अधिकृत घोषणा केलेली नाही. त्यामुळे सोशल मीडियावरील चर्चांना सध्या केवळ अंदाजाचे स्वरूप आहे.
Ayesha Khan Engagement | ‘शरारत’ गाण्यामुळेही आयेशा चर्चेत :
आयेशा खान याआधी ‘बिग बॉस 17’मधील सहभागामुळे प्रेक्षकांच्या परिचयाची झाली होती. त्यानंतर रणवीर सिंग अभिनीत ‘धुरंधर’ चित्रपटातील ‘शरारत’ या गाण्यातील तिच्या डान्सनेही तिला चांगलीच प्रसिद्धी मिळवून दिली. या गाण्यावर केलेल्या तिच्या नृत्याची चर्चा झाल्यानंतर आता तिच्या वैयक्तिक आयुष्याशी संबंधित पोस्टमुळे ती पुन्हा एकदा चर्चेच्या केंद्रस्थानी आली आहे.
दरम्यान, आयेशाच्या बोटातील अंगठी पाहून काही चाहत्यांनी तिचे लग्न किंवा साखरपुडा झाल्याचा अंदाज व्यक्त केला आहे. दुसरीकडे, हा फोटो एखाद्या ज्वेलरी ब्रँडच्या जाहिरातीसाठी किंवा फोटोशूटचा भाग असू शकतो, अशी शक्यताही काही जण मांडत आहेत. मिस्ट्री मॅनचा चेहरा न दाखवणे आणि अंगठीवर दिलेला भर यामुळे पोस्टबाबत उत्सुकता वाढली असली, तरी आयेशाने स्वतः याबाबत कोणतेही स्पष्ट विधान केलेले नाही. त्यामुळे या फोटोंमागील नेमके कारण समोर येण्यासाठी तिच्या अधिकृत प्रतिक्रियेची प्रतीक्षा आहे.
