Ajit Pawar Plane Crash | अजित पवार यांच्या विमान अपघातानंतर राज्यभरात मोठी चर्चा आणि संशयाचे वातावरण निर्माण झाले आहे. या घटनेनंतर विविध तपास यंत्रणा सक्रिय झाल्या असून प्रकरणातील काही महत्त्वाच्या व्यक्तींवर चौकशी सुरू आहे. दरम्यान, संबंधित विमान कंपनीच्या मालकाला तपासासाठी बोलावण्यात आल्याने या प्रकरणाला नवीन वळण मिळाले आहे.
विमान दुर्घटनेनंतर तपासाला वेग :
२८ जानेवारी २०२६ रोजी अजित पवार (Ajit Pawar) मुंबईहून बारामतीकडे जात असताना त्यांच्या खासगी विमानाला अपघात झाला. सकाळी सुमारे ८.१० वाजता ते मुंबई विमानतळावरून VSR कंपनीच्या विमानाने निघाले होते. मात्र उड्डाणानंतर अवघ्या काही वेळातच, सुमारे ८.४५ च्या सुमारास बारामती विमानतळाजवळील शेतात हे विमान कोसळले. या घटनेमुळे राज्यात मोठी खळबळ उडाली. अपघातानंतर समोर आलेल्या काही सीसीटीव्ही फुटेजमध्ये विमान एका बाजूला झुकल्याचे स्पष्ट दिसत असल्याने दुर्घटनेबाबत अनेक प्रश्न उपस्थित झाले.
या दुर्दैवी घटनेत अजित पवार यांचे निधन झाले आणि त्यानंतर संपूर्ण राज्य शोकसागरात बुडाले. त्यांच्या अंत्यदर्शनासाठी बारामतीकडे हजारो लोकांनी धाव घेतली. पवार कुटुंबीयांनी एकत्र येत त्यांना अखेरचा निरोप दिला. या घटनेनंतर राजकीय घडामोडींनाही वेग आला आणि काही दिवसांतच सुनेत्रा पवार (Sunetra Pawar) यांनी उपमुख्यमंत्रिपदाची शपथ घेतली. मात्र विमान दुर्घटनेबाबत अनेक संशय व्यक्त होत असल्याने तपासाची मागणी अधिक तीव्र झाली.
Ajit Pawar Plane Crash | VSR कंपनीच्या मालकाची चौकशी :
या प्रकरणात आमदार रोहित पवार (Rohit Pawar) यांनी गंभीर आरोप करत VSR कंपनीवर थेट बोट ठेवले. त्यांनी तपास प्रक्रियेबाबतही काही प्रश्न उपस्थित करत कंपनीच्या मालकावर कारवाई करण्याची मागणी केली होती. या पार्श्वभूमीवर आज VSR कंपनीचा मालक रोहित सिंह (Rohit Singh) पुण्यातील सीआयडी कार्यालयात चौकशीसाठी हजर झाला आहे. त्याच्याबाबत तो देशाबाहेर गेल्याची चर्चा सुरू असतानाच तो अचानक तपास अधिकाऱ्यांसमोर उपस्थित झाल्याने या प्रकरणात नवीन घडामोड झाली आहे.
दरम्यान, विमान दुर्घटनेबाबत एक प्राथमिक अहवाल समोर आला असला तरी त्याबद्दल अनेक शंका उपस्थित केल्या जात आहेत. नेमके कोणत्या कारणामुळे विमान कोसळले, तांत्रिक बिघाड होता की इतर काही कारण, याबाबत अद्याप स्पष्टता नाही. त्यामुळे विविध तपास यंत्रणा या प्रकरणाचा सखोल तपास करत आहेत. आता सीआयडी चौकशीतून नेमकी कोणती माहिती समोर येते, याकडे संपूर्ण राज्याचे लक्ष लागले आहे.
