Actor Rohit Chandel Arrested | मुंबई पोलिसांनी लोकप्रिय टीव्ही अभिनेता रोहित चंडेल याला अल्पवयीन मुलीच्या कथित लैंगिक छळप्रकरणी अटक केली आहे. ‘पांड्या स्टोअर’ आणि ‘काशीबाई बाजीराव बल्लाळ’ यांसारख्या मालिकांमधून ओळख मिळवलेल्या 29 वर्षीय अभिनेत्यावर 16 वर्षीय अल्पवयीन मुलीचा पाठलाग करणे, वारंवार फोन करून त्रास देणे आणि मारहाण केल्याचा आरोप करण्यात आला आहे. या प्रकरणात पोलिसांनी पॉक्सो (POCSO) कायद्यासह भारतीय न्याय संहितेतील (BNS) संबंधित कलमांखाली गुन्हा दाखल केला असून पुढील तपास सुरू आहे.
दहिसर येथील घरातून अटक
सूत्रांच्या माहितीनुसार, पंत नगर पोलिसांनी शुक्रवारी रोहित चंडेलला दहिसर येथील त्याच्या घरातून ताब्यात घेतले. त्यानंतर त्याला न्यायालयात हजर करण्यात आले असून न्यायालयाने पोलीस कोठडी सुनावली आहे. पोलिसांकडून प्रकरणाचा सखोल तपास सुरू असून सर्व पुरावे तपासले जात आहेत.
वारंवार फोन करून त्रास दिल्याचा आरोप
तक्रारदार महिलेच्या म्हणण्यानुसार, रोहित चंडेल अल्पवयीन मुलीला स्वतःच्या तसेच इतर मोबाईल क्रमांकांवरून वारंवार फोन करत होता. त्यामुळे मुलीला मानसिक त्रास सहन करावा लागल्याचा दावा तक्रारीत करण्यात आला आहे. पोलिसांच्या प्राथमिक माहितीनुसार, आरोपी आणि संबंधित मुलगी यांची यापूर्वी ओळख होती.
इमारतीजवळ अडवून मारहाण केल्याचा दावा
तक्रारीनुसार, 5 जुलै रोजी रोहित चंडेलने मुलीला तिच्या राहत्या इमारतीजवळ अडवले. मुलगी तेथून निघून जाण्याचा प्रयत्न करत असताना तिचा पाठलाग करण्यात आला. त्यानंतर वाद घालणे, शिवीगाळ करणे आणि हाताने मारहाण केल्याचा आरोपही करण्यात आला आहे.
कोणती कलमे लावली?
या प्रकरणात पोलिसांनी पॉक्सो कायद्याबरोबरच भारतीय न्याय संहितेतील (BNS) पाठलाग आणि दुखापत करण्यासंदर्भातील संबंधित कलमांखाली गुन्हा दाखल केला आहे. प्रकरणातील सर्व बाबींची चौकशी सुरू असून पोलिसांकडून पुरावे गोळा करण्याचे काम सुरू आहे.
‘सैराब’ मालिकेवर परिणाम होणार?
रोहित चंडेल सध्या स्टार प्लसवरील ‘सैराब’ या मालिकेत महत्त्वाची भूमिका साकारत आहे. त्याच्यावरील या गंभीर आरोपांनंतर मालिकेच्या निर्मात्यांमध्ये चिंतेचे वातावरण असल्याची चर्चा आहे. माध्यमांतील वृत्तांनुसार, पुढील परिस्थिती लक्षात घेऊन निर्माते सातत्याने बैठका घेत आहेत.
रोहित चंडेलचा पोलीस कोठडीचा कालावधी वाढल्यास त्याच्या जागी दुसऱ्या अभिनेत्याची निवड करण्याचाही पर्याय निर्मात्यांकडून विचाराधीन असल्याची चर्चा आहे. मात्र, याबाबत चॅनल किंवा निर्मात्यांकडून अद्याप कोणतेही अधिकृत वक्तव्य करण्यात आलेले नाही.
News Title: Actor Rohit Chandel Arrested POCSO Case Updates
