Plane crash video | कर्नाटकातील विजयापूर जिल्ह्यात पुन्हा एक धक्कादायक विमान अपघाताची घटना समोर आली असून याचा थरारक व्हिडीओ सोशल मीडियावर वेगाने व्हायरल होत आहे. रेड बर्ड एव्हिएशन संस्थेचे प्रशिक्षण विमान उड्डाणादरम्यान कोसळल्याने परिसरात खळबळ उडाली. सुदैवाने या दुर्घटनेत जीवितहानी झाली नसून दोन जण जखमी झाले आहेत.
प्रशिक्षण विमान कोसळले, परिसरात खळबळ :
गेल्या काही दिवसांपूर्वी अजित पवार (Ajit Pawar) यांच्या विमान अपघातानंतर महाराष्ट्रात मोठी चर्चा झाली होती. त्यानंतर आता कर्नाटकातील विजयापूर (Vijayapura) जिल्ह्यात आणखी एक धक्कादायक घटना घडली आहे. रेड बर्ड एव्हिएशन (Red Bird Aviation) या प्रशिक्षण संस्थेचे सेस्ना 172 (Cessna 172) प्रकारचे हलके विमान कलबुर्गी (Kalaburagi) येथून बेळगाव (Belagavi) कडे जात असताना मंगळूरू (Mangaluru) गावाजवळील शेतजमिनीवर कोसळले. हा अपघात बबलेश्वर तालुक्यात (Babaleshwar Taluka) घडला असल्याची माहिती समोर आली आहे.
— Naresh Shende (@NareshShen87640) February 8, 2026
अपघाताचा व्हिडीओ काही वेळातच सोशल मीडियावर व्हायरल झाला असून विमान उलटे पडलेले आणि तुटलेल्या अवस्थेत दिसत आहे. काही अहवालांनुसार, हे विमान कोसळताना तीन तुकड्यांमध्ये विभागले गेले होते. स्थानिक नागरिकांनी मोठ्या आवाजासह धुराचे लोट पाहिल्यानंतर तात्काळ घटनास्थळी धाव घेत मदतकार्य सुरू केले. या घटनेमुळे परिसरात काही काळ भीतीचे वातावरण निर्माण झाले होते.
Plane crash video | वैमानिक जखमी, तपास सुरू :
या दुर्घटनेत कॅप्टन कुणाल मल्होत्रा (Captain Kunal Malhotra), जे सहाय्यक फ्लाइट इन्स्ट्रक्टर आहेत, तसेच प्रशिक्षणार्थी वैमानिक गौतम संकर (Gautam Sankar) किंवा गौतम शंकर पी. आर. (Gautam Shankar P. R.) हे दोघे जखमी झाले आहेत. सुदैवाने कोणतीही जीवितहानी झाली नाही. जखमींना तातडीने स्थानिक रुग्णवाहिकेतून बीएलडीई रुग्णालयात (BLDE Hospital) दाखल करण्यात आले असून त्यांची प्रकृती स्थिर असल्याचे सांगण्यात आले आहे.
प्राथमिक तपासानुसार विमानातील इंधन संपुष्टात येणे (Fuel Starvation) किंवा इंजिनमधील तांत्रिक बिघाड हे या अपघातामागील संभाव्य कारण असू शकते, असा अंदाज वर्तवण्यात येत आहे. काही सूत्रांच्या माहितीनुसार, अपघात होण्यापूर्वी दोघांनी स्वतःला वाचवण्यासाठी प्रयत्न केल्याचेही सांगितले जात आहे. घटनेची माहिती मिळताच पोलीस आणि प्रशासन घटनास्थळी पोहोचले असून नागरी विमान वाहतूक महासंचालनालय (DGCA) आणि विमानन अधिकाऱ्यांनी चौकशी सुरू केली आहे. अपघाताचे नेमके कारण शोधण्यासाठी सखोल तपास केला जात आहे.
